Охрид Лихнидос со десетмина до бод од 0:2 до 2:2, „академик“ Росиќ му одржа лекција на Академија Пандев (Брера)

ГФК Охрид Лихнидос – Брера Струмица 2:2 (0:2)

Фудбалерите на ГФК Охрид Лихнидос со храбра, борбена и ефикасна игра во второто полувреме стигнаа до голем бод во дерби-пресметката од 7. коло во Втората македонска фудбалска лига против Брера Струмица (Академија Пандев).

Црвен картон уште во првата минута

Уште во првата минута, по исклучувањето на Валентин Кочоски, охриѓани останаа со играч помалку и целиот натпревар го одиграа со десетмина. Гостите од Струмица ја искористија бројчаната предност и на полувреме заминаа со водство од 2:0.

Пресвртот во второто полувреме

- Advertisement -

Во животот нема второ полувреме, во фудбалот има. Кога малкумина веруваа дека пресврт е можен, домаќините возвратија со два гола. Главен виновник беше Давор Росиќ, кој ја декласира одбраната на Брера и со две одлични асистенции им ги подготви головите на Матески и Бакрачевски за 2:2. Росиќ одигра маестрален натпревар и го смени текот на целата утакмица.

Спорен момент и шанса за целосен плен

Пред крајот, Росиќ беше фаулиран при влез во казнениот простор на Брера, но судијата не досуди пенал. И покрај тоа што речиси целиот натпревар го одиграа со играч помалку, охриѓани во финишот имаа можност да стигнат и до целосен плен.

Аплауз од трибините

На крајот, бројната публика со аплауз ги испрати своите миленици, наградувајќи ја нивната пожртвуваност, борбеност и прикажаната игра. Академија Пандев доби лекција од „академикот“ Росиќ.