Пожар во центарот за податоци на „Јандекс“ предизвикан од напад со украински дрон

Руските државни медиуми објавија дека избувнал пожар во центар за податоци на руската технолошка компанија „Јандекс“ во регионот Рјазањ, по напад со дрон.

Компанијата ја извести руската државна новинска агенција ТАСС дека пожарот, предизвикан од нападот со дрон, избувнал во нејзиниот центар за податоци во градот Сасово, при што е оштетен дел од инфраструктурата.

Од „Јандекс“ соопштија дека екипи работат на санирање на последиците од нападот и дека нема повредени лица.

- Advertisement -

Тие додадоа дека работата на центарот за податоци е прекината и дека некои услуги може да бидат недостапни за корисниците.

Одделно, гувернерот на регионот Рјазањ, Павел Малков, објави дека во текот на ноќта над регионот биле соборени два дрона.

„Во областа Сасово се запали покривот на еден локален деловен објект, а беа искршени прозорци на неколку приватни куќи. Според првичните информации, нема жртви“, изјави Малков, додавајќи дека службите за итни случаи се на терен.

Руското Министерство за одбрана соопшти дека неговата противвоздушна одбрана соборила 399 украински дрона над 19 региони – вклучително и Рјазањ – како и над Црното Море и Крим, кој беше анектиран во 2014 година.

Украинските власти сè уште не го коментирале нападот.

Во последните месеци, Москва и Киев ги интензивираа нападите, гаѓајќи ги меѓусебните логистички центри, пристаништа и енергетската инфраструктура. Двете страни негираат дека намерно гаѓаат цивилна инфраструктура, тврдејќи дека нападите се насочени кон воени цели или објекти поврзани со воени активности.