Мадуро и неговата сопруга се соочуваат со нови обвиненија, овојпат за наводно мачење на Американци

Наводно се подготвуваат нови обвиненија против поранешниот претседател на Венецуела, Николас Мадуро, и неговата сопруга Силија Флорес, кои се наоѓаат во притвор во Њујорк уште од почетокот на јануари, пренесува Си-Ен-Ен (CNN).

Обвинителите во Њујорк наводно подготвуваат нови обвиненија против претседателот на Венецуела, Николас Мадуро, и неговата сопруга Силија Флорес во врска со наводното мачење на американски државјани затворени во Венецуела во последните години. Според неколку извори запознаени со истрагата, обвиненијата би можеле да бидат обелоденети уште денес.

Новите обвиненија наводно се однесуваат на притворањето на повеќе од десетина американски државјани во венецуелски затвори за време на владеењето на Мадуро. Владата на САД го оцени нивното притворање како незаконско, изјавија извори запознаени со истрагата.

- Advertisement -

Според еден извор, истражителите разговарале и за можноста за поднесување обвиненија против неколку други лица за нивната наводна вмешаност во мачењето на американски државјани.

Мадуро и неговата сопруга се држат во притвор во Њујорк без можност за кауција уште од јануари, кога американските сили ги фатија во претседателската палата во Каракас. И двајцата ги негираат обвиненијата за заговор за вршење нарко-тероризам и други кривични дела.

Флорес наводно треба денес да се појави пред суд, каде што нејзиниот адвокат ќе побара таа да биде префрлена во домашен притвор до почетокот на судењето. Во меѓувреме, адвокатот на Мадуро ја оспорува законитоста на неговото апсење, тврдејќи дека поранешниот претседател на Венецуела треба да ужива имунитет бидејќи наводните кривични дела биле извршени додека тој ја извршувал функцијата претседател. Според обвинителството, владата на Венецуела не се повикува на имунитет во негово име, пренесува Си-Ен-Ен.

Владата на Мадуро има притворено повеќе од десетина американски државјани, а американските власти и активистите за човекови права ја обвинуваат дека ги користи како политички заложници.

Според Си-Ен-Ен, Американците се држат во озлогласените објекти на Генералниот директорат за воено контраразузнавање (DGCIM), за кој во извештај на Обединетите нации е утврдено дека е одговорен за „произволни притворања, лош третман и мачење на политичките противници и нивните роднини“. Извештајот откри дека DGCIM рутински применувала разни методи на тортура, вклучувајќи електрошокови, симулирање давење со вода (вотербординг), тепање, сексуално насилство, ускратување храна и вода, принудно задржување во болни физички положби и изложување на екстремни температури. Овие методи наводно се користеле за изнудување информации и признанија од притворените, како и за нивно заплашување и казнување, додава CNN.