Осуммина загинати во руските напади врз украинските градови

Стамбени и цивилни објекти во Киев и други украински градови беа погодени од руски напади со ракети и беспилотни летала во текот на ноќта, при што загинаа најмалку осум лица, соопштија украинските власти.

Претходно беше објавено дека најмалку две лица загинале, а оштетена е цивилна инфраструктура во ноќниот напад со балистички ракети врз Киев, извршен околу 3 часот наутро.

Нападите уследија по предупредувањето од украинскиот претседател Володимир Зеленски на платформата „Икс“ (поранешен Твитер) дека Русија се подготвува за нов масовен напад врз неговата земја, пренесува новинската агенција АП.

- Advertisement -

Најмалку четири лица загинаа, а 20 се повредени – меѓу кои и три деца – во напад врз градот Прилуки во регионот Чернихив, според првичните информации од службите за итни случаи.

Вјачеслав Чаус, шеф на Регионалната воена управа на Чернихив, изјави дека ракета погодила повеќекатна станбена зграда во Прилуки, што резултирало со жртви.

Воената управа на Киев претходно соопшти дека ракета погодила нестанбен објект во киевската област Подилски, предизвикувајќи пожар. Во областа Дарницки, ракета предизвикала пожар во комплекс од гаражи, предизвикувајќи штета. Властите изјавија дека пожарот е изгаснат. Остатоци од нападот биле пронајдени и на блиска отворена површина. Воената управа соопшти дека во нападот загинале две лица, без да даде дополнителни детали.

Тимур Ткаченко, шеф на регионалната воена управа на Киев, изјави дека поширокиот регион на Киев исто така бил цел на комбиниран напад со беспилотни летала и балистички ракети.

Тој наведе дека во областа Обухив биле оштетени три производствени погони и магацини, а пожарите што настанале биле изгаснати.

Оштетени биле и камион и приколка, додаде Ткаченко. Во Кременчук, во областа Полтава, загинаа две лица, а седум беа повредени, изјави Виталиј Дијакивнич, шеф на регионалната воена управа, додавајќи дека операциите за спасување се во тек. „Токму на тоа смета непријателот – дека ќе се плашиме да заспиеме, да ги испуштиме децата од вид или да правиме какви било планови; дека секој ќе мисли оти неговата локација би можела да биде следната цел на напад“, рече тој.

Руското Министерство за одбрана соопшти дека нејзината војска извршила голем ноќен напад врз индустриски капацитети низ Украина, конкретно таргетирајќи локации каде што се произведуваат и складираат ракети и беспилотни летала.

Руското министерство наведе дека цел на нападите биле капацитети во Киев и околниот регион, како и во областите Чернихив, Кировоград, Днипропетровск, Полтава и Харкив. Министерството додаде дека биле погодени пристаниште и капацитети за поправка на бродови во областа Одеса, како и украински воени товарни бродови.

Руските сили честопати ги таргетираат станбените области, електричните мрежи и цивилната инфраструктура низ Украина, иако Москва инсистира дека напаѓа само воени цели, пренесува новинската агенција АП.