ЕЛМАС НЕ СЕ ОТКАЖУВА ОД НАЈГОЛЕМИОТ СОН

Елиф Елмас не се откажува од сонот да игра на Светско првенство со македонската репрезентација, а желбата е толку голема што вели дека би играл и по 40-тата година, доколку тоа е потребно за Македонија да стигне до Мундијал.

Македонскиот репрезентативец во опширно интервју за „Flashscore“ зборуваше за својата кариера, статистиката и амбициите со националниот тим, при што јасно порача дека настапот на Светско првенство со Македонија останува неговата крајна цел.

– Отсекогаш ми бил сон да играм на Светско првенство со Македонија. Настапив на Европското првенство за играчи до 21 година во 2017 година, а потоа и на Европското првенство во 2021 година. Затоа Светското првенство е мојата крајна цел. Но, Македонија мора да продолжи да напредува од година во година – изјави Елмас.

- Advertisement -

Тој смета дека македонската репрезентација прво треба да се насочи кон пласман на Европското првенство во 2028 година, а потоа да го направи и чекорот кон Светското првенство.

– Не треба да мислиме само на Светското првенство. Прво треба да гледаме кон Европското првенство во 2028 година, а потоа ќе дојде и Светското. Сè додека сум здрав и можам да играм, ќе давам максимум. Мојата цел секогаш ќе биде настап на Европско и Светско првенство. Се надевам дека нема да ја завршам кариерата додека не се пласирам на Светско првенство, дури и ако тоа се случи по мојата 40-та година – порача македонскиот репрезентативец.
Елмас во интервјуто зборуваше и за својата индивидуална форма и призна дека статистиката во моментов не е на нивото на кое сака да биде.

– Сакам да одиграм цела сезона и да видам каде стојам статистички. Ако ги погледнете моите бројки, тие не се таму каде што треба да бидат. Тоа е единственото нешто што ми недостига. Статистиката ми е голем проблем. Ако го решам тој статистички проблем, луѓето ќе зборуваат за поинаков Елиф Елмас – рече тој.

Македонскиот фудбалер, сепак, вели дека нема сомнеж во сопствените квалитети и дека верува оти може да покаже многу повеќе на теренот.

– Затоа мислам дека прво треба да ги подобрам моите бројки, а потоа луѓето ќе гледаат на поинаков начин на мене. Немам никакви сомнежи во мојот квалитет, затоа што точно знам што можам – истакна Елмас.

За 27-годишниот македонски репрезентативец, сепак, најголемиот предизвик останува да го облече националниот дрес на најголемата светска фудбалска сцена.

По настапот на Европското првенство во 2021 година, Македонија сè уште го чека својот прв пласман на Светско првенство. Елмас, пак, не крие дека е подготвен да чека колку што е потребно за да го оствари својот најголем репрезентативен сон.