Украдени 95 милиони евра од најголемата италијанска банка со помош на вештачка интелигенција

Измамници кои користеле вештачка интелигенција за да ги имитираат гласовите на високи раководители украле 95 милиони евра од „Фидеурам“ (Fideuram), одделот за приватно банкарство на најголемата италијанска банка „Интеза Санпаоло“ (Intesa Sanpaolo). Повеќе од половината од средствата подоцна биле вратени, но околу 36 милиони евра сè уште недостасуваат, пренесува Ројтерс, повикувајќи се на извори запознаени со случајот.

Измамата започнала во февруари, кога Паоло Молесини, тогашниот извршен директор на „Фидеурам“, добил порака на WhatsApp која изгледала како да е испратена од Карло Месина, извршниот директор на „Интеза Санпаоло“. Во пораката се барала итна помош за меѓународна финансиска трансакција, пренесува „Еуронекст“ (Euronext).

Набргу потоа уследил телефонски повик од лице кое се претставило како партнер во угледна адвокатска канцеларија и го потврдило барањето. Измамниците користеле вештачка интелигенција за да го имитираат гласот на адвокатот, со што дополнително ја зголемиле веродостојноста на измамата.

- Advertisement -

Убеден дека постапува според легитимни упатства, Молесини му наложил на одделот за финансии да изврши серија трансфери кон сметки во странство, главно во Кина и Хонг Конг.

Вратени 53 милиони евра; трагата по остатокот изгубена
Набргу биле откриени неправилности, по што „Фидеурам“ ги известила банките и надлежните органи во неколку земји. Благодарение на меѓународната соработка меѓу властите во Италија, Кина и Португалија, вратени се околу 53 милиони евра.

Останатите 36 милиони евра сè уште не се пронајдени. Според достапните информации, средствата биле префрлени преку мрежа на странски сметки, а потоа претворени во криптовалути, што дополнително го отежнува нивното следење.

Извори запознаени со истрагата наведуваат дека Молесини и другите раководители на „Фидеурам“ не се предмет на истрага. Сепак, обвинителството во Милано води истрага против странски државјанин кој живее надвор од Европа, под сомнение за компјутерска измама.

Молесини поднесе оставка од функцијата извршен директор во март, наведувајќи лични причини. Во тоа време, банката не даде дополнително објаснување за неговото заминување.

Случаите на измама со помош на вештачка интелигенција стануваат сè почести
Ова не е прв случај во Италија во кој криминалци користеле вештачка интелигенција за да го имитираат гласот на истакната личност и да извлечат пари од жртва. Минатата година, измамници го имитираа гласот на еден италијански владин министер и го убедија претприемачот Масимо Морати да префрли речиси еден милион евра на странска сметка. Подоцна, средствата беа успешно повратени.