ПАТНИКОТ ОД ДРАМАТА ВО „ФЛАЈДУБАИ“ СЕ СРЕТНА СО НЕТАНЈАХУ

Патникот кој помогна да биде совладан осомничениот копилот на летот на „Флајдубаи“ се сретна со израелскиот премиер Бенјамин Нетанјаху, додека ранетиот капетан Смит Мачар закрепнува во Саудиска Арабија.

Нетанјаху го нарече патникот „херој и лав“ и најави дека допрва ќе се утврдува дали нападот во авионот кој понираше 5.500 метри за 90 секунди бил обид за терористички чин.

Додека трае истрагата, авиокомпанијата ги суспендира летовите до и од Израел.

Крвава кошула, прегратка од Нетанјаху

- Advertisement -

Израелецот Јанив Хајун, по враќањето во Израел, сè уште облечен во крвавата кошула од борбата, се сретнал со Нетанјаху.

– Те гледам и гледам лав, голем херој – му рекол Нетанјаху на Хајун.

Хајун раскажал дека слушнале вресоци, а потоа почувствувале дека авионот нагло почнува да губи висина. Кога влегол во пилотската кабина, го затекнал ранетиот капетан на подот и другиот пилот кај контролите.

Патниците го совладале осомничениот, додека Хајун се обидел да помогне авионот да се израмни. Подоцна контролата ја презеле членови на екипажот.

Нетанјаху изјави дека нивната реакција спречила нешто што можело да прерасне во катастрофа од размерите на нападите од 11 септември. Сепак, тој нагласи дека точниот мотив на осомничениот сè уште не е утврден.

Напаѓачот од Оман, мотивот под истрага

Израелски претставници го идентификувале осомничениот копилот како државјанин на Оман. Тој е задржан и испрашуван од саудиските власти, а Нетанјаху најави дека Израел би можел да учествува во истрагата.

Израелскиот премиер рече дека засега е прерано да се утврди дали зад инцидентот стои Иран или друга страна.

– Прерано е да се каже – изјави Нетанјаху на прашањето за можна иранска вмешаност.

„Флајдубаи“, исто така, повика да не се изнесуваат предвремени заклучоци. Компанијата соопшти дека причините за инцидентот сè уште не се познати.

Израелските власти дополнително проверуваат како пилоти од Оман добивале дозволи да летаат кон Израел, бидејќи двете земји немаат дипломатски односи.

„Флајдубаи“ ги приземји летовите

Компанијата ги суспендира летовите до и од Израел додека трае истрагата за нападот.

Авионот летал од Дубаи кон Тел Авив со 174 лица. По драмата во пилотската кабина испратил сигнал за помош и принудно слетал во Табук, Саудиска Арабија.

Мачар останал на лекување во Саудиска Арабија, додека патниците подоцна безбедно пристигнале во Израел. Индискиот премиер Нарендра Моди и Нетанјаху јавно ја пофалија храброста на ранетиот капетан.

Малку фалело за катастрофа

Нови детали откриваат колку малку недостигало драмата во воздухот да заврши со катастрофа. Авионот со 174 лица нагло изгубил илјадници метри висина откако капетанот бил нападнат во пилотската кабина.

Мачар, индиски државјанин и искусен пилот, бил тешко ранет со нож. Сепак, успеал да го активира механизмот за отворање на вратата од пилотската кабина.

Токму тоа им овозможило на патниците и на членовите на екипажот да влезат и да го совладаат напаѓачот. Друг член на екипажот потоа помогнал авионот да биде стабилизиран.