РАДЕВ ЈА ПОВИКА ЕВРОПА ДА ПОЧНЕ РАЗГОВОРИ СО РУСИЈА ЗА ДА СЕ СПРЕЧИ НУКЛЕАРЕН НАПАД

Европската Унија мора да се вклучи во дипломатски дијалог со Русија за да се стави крај на војната во Украина и да се спречи разорен нуклеарен напад, изјави бугарскиот премиер Румен Радев на Самитот за одбрана и вселена.

Русија има најголем нуклеарен арсенал во светот, за кој се проценува дека вклучува околу 4.400 боеви глави, од кои 1.796 се стратешки распоредени.

Радев, исто така, го критикуваше континуираното снабдување со оружје и муниција на Украина од страна на европските земји, опишувајќи го како неуспешна стратегија за постигнување „мир преку сила“.

- Advertisement -

– Постои ограничување на она што можеме да го постигнеме само со снабдување со оружје и поддршка, бидејќи конечното мировно решение ќе се постигне преку дипломатија, а не преку снабдување со оружје. Затоа нашиот повик е да слушаме повеќе и да ги отвориме каналите за комуникација – рече Радев.

Проблемот е што никој не го поставува прашањето за нуклеарниот ризик, додаде тој.

– Дали постои? Можеби не, не знам, но тоа е ризик. Секогаш треба да размислуваме за најлошото сценарио. Дали сме подготвени за тоа? Дали некој зборува за проценка на ризикот? Дали воопшто постои таква проценка? Бидејќи се обидуваме да постигнеме конвенционална победа над најголемата нуклеарна сила – додаде бугарскиот премиер.

Радев се осврна на неодамнешната изјава на рускиот министер за надворешни работи Сергеј Лавров, кој рече дека евентуалната војна меѓу Русија и Европа би била „сосема поинаква и многу кратка“. Коментарот беше сфатен како прикриена нуклеарна закана.

Бугарскиот премиер го отфрли „овој тип на разговор“ од Кремљ, но ги повика европските лидери да размислат до што може да доведе ескалацијата.

Тензиите растат додека Москва ги засилува своите хибридни напади врз европските земји во обид да всади страв во општествата и да ја одврати воената поддршка за Украина.

– Постои нуклеарна карта и Русија би била подготвена да ја искористи доколку биде ослабена или ставена во ќош. Мора да го имаме ова в предвид. Не можеме да затвораме очи пред фактот дека има нуклеарно оружје на нашиот континент, а Русија има нуклеарно оружје во својот арсенал. И ова е дел од стратешките пресметки – рече Радев.

Бугарскиот премиер Радев е меѓу малцинството европски лидери кои се залагаат за поблизок дипломатски ангажман со Русија, за да се стави крај на војната во Украина. Словачка, Чешка и Австрија, исто така, го поддржаа дијалогот. Меѓутоа, другите европски земји веруваат дека Кремљ има мал интерес за значајни преговори и продолжува да се залага за максималистички барања.

Обидите на САД да посредува за прекин на огнот и за мировни преговори досега не успеаја.  Сепак, Радев ја повика Европа да ги ребалансира своите „воени, економски и дипломатски инструменти“ со тоа што ќе стави поголем акцент на дипломатијата.

Тој, исто така, ја отфрли етикетата „проруска“ што беше упатена кон неговата влада откако Бугарија стави вето на санкциите против патријархот Кирил оваа година.

– Војната во Украина го тестираше нашето критичко размислување и нашиот реалистичен пристап. Таа ја тестираше нашата способност да го процениме стратешкиот центар на гравитација на непријателот. Пред сè, ја тестираше нашата способност да формулираме остварливи политички цели, да ги преведеме во здрава воена стратегија и да ја дефинираме посакуваната крајна состојба. Не ја исцрпевме моќта на дипломатијата и мора да направиме и кажеме повеќе – рече Радев.