ПРОДАВАЛЕ МРАЗ СО БАКТЕРИИ НАПРАВЕН ОД КРАДЕНА ВОДА

Полицијата поднесе кривична пријава против двајца радовишани, кои неовластено и во нехигиенски услови произведувале мраз во кој е утврдено присуство на бактерии, а водата за производство ја обезбедувале од нелегален приклучок на водоводна мрежа.

Т.Д.(62) и С.Д.(62) ќе одговараат за кривично дело „производство и пуштање во промет штетни прехранбени и други продукти“ по член 213 Кривичниот законик. Тие се лишени од слобода и задржани во Полициската станица Радовиш.

Како што соопшти полицијата, пријавените повеќе години наназад, како нерегистрирани производители на мраз, вршеле производство на мраз во импровизирани и нехигиенски услови и така небезбедно произведен го пуштале во промет на други правни и физички лица. На 16.09.2026, врз основа на судска наредба, полициски службеници од СВР Струмица-ОВР Радовиш во координација со државен инспектор за храна од Агенција за храна и ветеринарство извршиле претреси во дом и други простории, на четири локации, кои ги користат пријавените.

- Advertisement -

На терасата во приземниот дел од куќата во која живеат биле пронајдени замрзнувачи во кои имало поголем број ќеси во кои имало коцки мраз, кои биле складирани и оставени од пријавените за продажба по принцип на самопослужување, а парите од продажба се оставале во посебна кутија. Додека, во подрумските простории од куќата биле пронајдени четири машини за производство на мраз во коцки и уште еден фрижидер-замрзнувач во кој имало поголема количина коцки мраз, спакувани во ќеси за продавање.

По насоки од државниот инспектор, од стручен тим акредитирана лабораторија за испитување на храна и вода, земени се примероци од водата која што се употребува како суровина во производство на мраз, готовиот производ-мраз од ќесите од трите замрзнувачи и брисеви од опремата за производство на мраз. Од добиениот извештај од микробиолошка и хемиска анализа на водата е утврдено дека само таа одговара на бараните параметри согласно Правилникот за барање за безбедност и квалитет на водата за пиење. Сите останати примероци земени за анализа не одговарале на бараните параметри и во овие примероци било потврдено присуство на бактерии ешерихија коли и колиформни бактерии, со кое е докажано дека мразот бил небезбеден за употреба и штетен по здравјето на луѓето заради контаминација со бактерии од фекално потекло. По добиените резултати, од Агенцијата за храна и ветеринарство, пронајдените ледомати и замрзнувачи со готовиот мраз од околу 850 килограми се запечатени и одземени.

При извршените претреси било утврдено дека производството на мраз се вршело со довод на вода поставен на повеќе места, а од вработени во Јавно претпријатие „Плаваја“ Радовиш е констатирано дека водата која се користи во подрумскиот дел не се мери преку водомер.

При претресот во објектот на пријавените на место викано „Гладно поле“ атар на Радовиш, за кој е констатирано дека е бесправно изграден, била пронајдена и одземена воздушна пушка, која ја поседувале без соодветна документација.

По целосно документирање на случаите за бесправно изградениот објект и одземената пушка, СВР Струмица-ОВР Радовиш ќе поднесат соодветни пријави.