Хутите го презедоа стратешкиот теснец Баб ел-Мандеб

Големиот муфтија на Саудиска Арабија, шеикот Салех бин Фавзан Ал-Фавзан, испрати невообичаено остра порака до саудиските војници – да бидат подготвени да ги дадат своите животи во борбата против Хутите. Повикот доаѓа додека проиранската група напредува во Јемен и ја засилува заканата врз стратешкиот теснец Баб ел-Мандеб.

Муфтијата директно им се обрати на војниците на фронтот, повикувајќи се на верската должност за одбрана на земјата и нејзините свети места.

– Заштитата на оваа голема нација и казнувањето на секој што ќе се обиде да посегне по макар еден сантиметар од нејзината територија се меѓу најголемите должности и најблагородните дела на побожност, за кои можат да се жртвуваат животи и души – порача Ал-Фавзан.

- Advertisement -

Тој ги повика војниците да ги слушаат своите команданти и владетели, нагласувајќи дека ја бранат земјата во која се наоѓаат најсветите места на исламот.

Пораката доаѓа по големите територијални придобивки на Хутите долж јеменскиот брег на Црвеното Море. На 11 септември тие стигнаа и до стратешкиот остров Перим во Баб ел-Мандеб, со што дополнително ја зацврстија позицијата околу поморскиот премин.

Баб ел-Мандеб го поврзува Црвеното Море со Аденскиот Залив и е една од клучните артерии за светската трговија. Безбедноста на пловидбата низ него веќе стана тема и на разговорите меѓу саудискиот престолонаследник Мохамед бин Салман и рускиот претседател Владимир Путин.

Во исто време продолжуваат нападите врз Саудиска Арабија. Саудиските власти на 24 септември соопштија дека пресретнале и уништиле шест балистички ракети, а Советот за соработка на Заливот ги осуди нападите насочени кон Таиф и Јанбу.

Ескалацијата веќе има последици и надвор од бојното поле. Борбите во Јемен принудија повеќе од 100.000 луѓе да ги напуштат своите домови, додека напредувањето на Хутите кон Баб ел-Мандеб ја зголемува загриженоста за пловидбата и снабдувањето преку Црвеното Море.