НЕТАНЈАХУ ГИ ОТФРЛИ ОБВИНУВАЊАТА ЗА ГЕНОЦИД

Израелскиот премиер Бенјамин Нетанјаху денеска ги отфрли обвинувањата дека Израел врши геноцид во Појасот Газа, истакнувајќи дека неговата земја се брани, во говорот на општата политичка дебата во рамки на 81. годишна сесија на Генералното собрание на Обединетите нации.

– Израел се брани – нагласи Нетанјаху и праша која држава што врши геноцид испраќа тони хуманитарна помош и милиони вакцини против детска парализа. Тој додаде дека Израел води војна на седум фронта, но дека постои и осми фронт – низа држави кои издвојуваат милијарди долари за кампања на дезинформации против Израел.

Израелскиот премиер упати остри критики кон политичарите кои го обвинуваат Израел за геноцид, меѓу кои и турскиот претседател Реџеп Тајип Ердоган, кого, меѓу другото, го обвини дека сака да стави рака врз Сирија. Во врска со изјавите на Ердоган во поддршка на Палестинците, Нетанјаху нагласи дека Ерусалим е „вечен главен град“ на Израел, а за турскиот претседател рече дека е тиранин, додека Турција ја нарече „супер-распространувач на дезинформации“.

- Advertisement -

За насилниот однос на израелските доселеници на Западниот Брег, Нетанјаху изјави дека станува збор за „грст млади прекршители на законот“ — околу 150 луѓе кои фрлаат камења и корнат маслинови дрвја — обвинувајќи ги меѓународните медиуми дека им придаваат несразмерно внимание.

Нетанјаху изјави дека нападот врз Иран бил една од најлесните одлуки што морал да ги донесе, нарекувајќи го режимот во Техеран „смртоносен“ и изрази уверување дека еден ден иранскиот народ ќе биде слободен. Тој додаде дека Израел ќе продолжи да се брани и ќе победи бидејќи нема друг избор, притоа нагласувајќи дека земјата нема поголем партнер од американскиот претседател Доналд Трамп, на кого му се заблагодари.

Израелскиот лидер упати критики и кон градоначалникот на Њујорк, Зохран Мамдани, обвинувајќи го дека ги изложува Евреите во градот на опасност поради неговите критики за воените дејствија во Газа и ширењето лаги за Израел.

Пред Нетанјаху да почне да зборува, десетици делегати ја напуштија салата на иницијатива на палестинската делегација, која испрати порака со повик за бојкот. Нетанјаху ги нарече дипломатите кои си заминаа „морални кукавици“.

– Ако во оваа сала сè уште има кукавици кои не ја напуштиле, нека го направат тоа сега – изјави израелскиот премиер кога ја презеде говорницата. Тој нагласи дека Израел всушност штити многу од земјите чии делегати си заминаа и додаде дека многу лидери во приватни разговори му се заблагодариле што Израел го уништил иранското нуклеарно оружје.

Подоцна Израел објави листа од 77 земји чии претставници или не биле присутни или демонстративно заминале за време на говорот на Нетанјаху. Меѓу делегациите се претставници на Словенија, Босна и Херцеговина, Шпанија, Ирска и Сан Марино, како и на Турција, Иран, Саудиска Арабија, Египет, Јордан, Катар, Ирак, Јужна Африка, Бразил, Чиле, Колумбија, Индонезија и Малезија.