Поранешниот холивудски продуцент Харви Вајнстин денеска беше осуден на 15 години затвор за сексуален напад врз поранешната асистентка Миријам Хејли извршен во 2006 година

Поранешниот холивудски продуцент Харви Вајнстин денеска беше осуден на 15 години затвор за сексуален напад врз поранешната асистентка Миријам Хејли извршен во 2006 година.

По поништувањето на првичната пресуда и двете последователни судења кои завршија без конечен исход, оваа одлука претставува клучен расплет на њујоршкото поглавје од деветгодишната правна сага што го поттикна глобалното движење #MeToo. Освен ако одбраната не успее со нова жалба, 74-годишниот Вајнстин ќе остане зад решетки за да ја отслужи оваа новоизречена казна.

Вајнстин сега се соочува со посебно изрекување на казна во Калифорнија за силување и сексуален напад врз италијанската актерка и манекенка Евгенија Чернишова во хотел во Лос Анџелес во 2013 година.

- Advertisement -

Во емотивно обраќање пред судот, Миријам Хејли изјави дека „сигурно никогаш не помислила оти ќе стои на истото место шест години по првата пресуда“, изразувајќи надеж дека ова ќе биде нејзиното последно сведочење. Таа детално го опиша мачниот и непријатен процес на сведочење, проследен со понижувачки вкрстени испрашувања и постојано онлајн вознемирување и закани.

– Често се чувствував како јас да сум таа на која ѝ се суди. Овој процес беше најлошата одлука во мојот живот на лично ниво. Многупати размислував да се откажам – рече Хејли.

Хејли досега сведочела против Вајнстин на две судења. Таа првично придонесе за неговата осуда во 2020 година, која беше поништена четири години подоцна. На повтореното судење во 2025 година, таа повторно сведочеше, па поротата го прогласи за виновен за сексуален чин од прв степен.

Во последните години, посрамениот продуцент се соочува со сериозни здравствени проблеми, вклучувајќи хронична миелоидна леукемија, дијабетес и значително нарушена подвижност.

Изречената затворска казна од 15 години речиси сигурно значи дека тој ќе го помине остатокот од својот живот зад решетки.

Поранешниот холивудски продуцент Вајнстин досега е осудуван на вкупно 54 години затвор – 23 години во Њујорк и 16 години во Калифорнија, плус денешните 15 години. Сепак, првите 23 години беа поништени, а калифорниската казна од 16 години во јуни годинава беше укината и треба повторно да се одмери. Во затвор и во притвор Вајнстин досега има поминато повеќе од шест години.