Тошковски изнесе детали за големата акција во Струмичко

Министерот за внатрешни работи Панче Тошковски денеска им се заблагодари на полициските службеници од Струмица за успешната акција во која е откриена нелегална плантажа на канабис, одземени се 680 килограми стебла, а притоа се уапсени две лица од Ново Село на 34 и 30 годишна возраст.

Тошковски откри дека полициски службеници , кои учестевувале во акцијата, со цел да ги фатат на дело одгледувачите, неколку дена спиеле на нива. Според МВР, уапсените во сокриен дел од парцелата на место викано „Матник“ во атарот на село Секирник, струмичко, ја обработиле почвата, посадиле и одгледувале стебла канабис. Во истрагата е утврдено дека дел од ова производство било наменетао за пазари надвор од Македонија.

– Дрогата е детектирана и обезбедена, а луѓето кои што биле директно вклучени во рамки на процесот на производство и пуштање во промет на истата се обезбедени и ќе бидат изведени пред лицето на правдата. Доколку вакви постапки во текот на годините почесто биле спроведувани немаше да бидеме до ова дереџе – изјави Тошковски.

- Advertisement -

Министерот Тошковски рече дека акцијата е доказ дека МВР и бирото за јавна безбедност се посветени на разоткривање и соодветно процесуирање на вакви кривични дела.

Уапсените се гонат за „неовластено производство и пуштање во промет на наркотични дроги, психотропни супстанции и прекурсори”.