МЕРЦ ВО ПРОБЛЕМ, БРИСЕЛ ВО НЕИЗВЕСНОСТ, ЌЕ ИМА ЛИ ПАРИ?

Политичките проблеми на Фридрих Мерц во Германија донесоа неизвесност околу агендата на Европската Унија, а Брисел се подготвува за месеци неизвесност околу судбината на германскиот канцелар.

Најитна загриженост е предложениот седумгодишен буџет на ЕУ за периодот 2028-2034 година кој изнесува 2.000 милијарди евра – договор што треба да се постигне и што ќе наметне тешки избори во сè, од одбраната до земјоделските субвенции.

Без цврста поддршка за тој компромис од Германија, која е најголемата земја-членка на ЕУ и без нејзината помош во водењето на преговорите  – постигнувањето договор до крајот на оваа година станува многу потешко.

- Advertisement -

Четири функционери вклучени во преговорите за европскиот буџет изјавија за „Фајненшл тајмс“ дека тешките загуби на демохристијаните на Мерц на неодамнешните покраински избори во Германија ја принудија ЕУ да преиспита што може да се постигне во наредните месеци.

„Мерц е во голема неволја и тоа очигледно има големо влијание врз она за што можат да се согласат лидерите на ЕУ. Кога се соочувате со избор помеѓу многу слаб германски канцелар и сосема нов германски канцелар, нема добри опции“, рече висок функционер на ЕУ.

Кога беше прашан за неговата политичка иднина минатата недела, Мерц рече дека има важни задачи на кои треба да се посвети, вклучително и преговорите за буџетот на ЕУ. Тој рече дека „интензивно разговара“ за тоа како да се пристапи кон буџетот за области како што се конкурентноста, одбраната и отпорноста.

Мерц инсистира дека сака да остане на функцијата канцелар и лидер на својата партија ЦДУ по катастрофалните резултати во две источногермански покраини. Во Саксонија-Анхалт, Алтернатива за Германија освои најмногу гласови на изборите овој месец и сега се обидува да формира покраинска влада за прв пат. На изборите во Мекленбург-Западна Померанија одржани во неделата, ЦДУ за прв пат во својата 81-годишна историја падна под прагот од 5 проценти, потребен за влез во покраинскиот парламент.

Додека Франција се соочува со можноста да добие претседател од редовите на евроскептичната крајна десница по изборите во април, а слични партии добиваат на сила пред парламентарните избори во Италија, Шпанија и воПолска, лидерите на ЕУ предупредуваат дека отсуството на договор за буџетот за периодот 2028-2034 година до крајот на декември би можело да ја остави Унијата без договор пред да започнат исплатите во јануари 2028 година.

– Без оглед на тоа кој е на власт, во Германија или каде било на друго место, ако не постигнеме договор до крајот на оваа година навистина ќе ги разочараме корисниците на средствата од буџетот на ЕУ од 1 јануари 2028 година, што сериозно ќе влијае на кредибилитетот на Унијата – изјави Томас Берн, ирски министер за европски прашања.

Покрај прашањето за буџетот, Брисел се стреми и да одговори на трговските закани што Кина ги претставува за економијата на ЕУ, да го олесни товарот на климатските регулативи врз бизнисите и да ја одржи поддршката за Украина.

Еден висок европски дипломат вели дека улогата на Германија традиционално била да го препознае „моментот кога е вистинско време да се интервенира и да се подмачкуваат запчаниците на машината кога ќе се заглават, а сега е јасно дека Мерц не може да го стори тоа“.