Курти разговараше за пресудата на Специјализираните совети на Косово со американски конгресмени

Албин Курти се сретна со американските конгресмени Мајк Лолер и Џо Вилсон во Њујорк, на маргините на 81-та сесија на Генералното собрание на Обединетите нации. Тие разговараа за деактивирањето на адресите на Албанците во Србија, како и за пресудата изречена од Специјализираните совети на Косово во Хаг против лидерите на таканаречената ОВК.

По средбите, Курти на социјалната мрежа „X“ изјави дека со Лолер разговарал за односите меѓу Косово и САД, привлекувањето инвестиции и статусот на Албанците во Прешевската Долина.

Една од темите беше деактивирањето на адресите на Албанците во Србија. Курти изјави дека побарал поддршка од Лолер за решавање на ова прашање, истакнувајќи дека деактивирањето влијае врз правото на глас и пристапот до официјални документи. На средбата присуствуваше и Шаип Камбери, единствениот албански пратеник во Народното собрание на Србија.

- Advertisement -

Курти со Лолер разговараше и за пресудата на Специјализираните совети на Косово против лидерите на ОВК, објавена минатата недела. Тој оцени дека одредени заклучоци на судот се засноваат на неточно утврдени факти, погрешно толкување на историските околности и правни грешки. Курти изрази очекување дека овие грешки ќе бидат исправени во текот на жалбената постапка.

На посебна средба со конгресменот Џо Вилсон, Курти разговараше за безбедносната соработка меѓу Косово и САД, зголемените трошоци за одбрана, аспирациите на Косово за членство во НАТО и тековната соработка меѓу Безбедносните сили на Косово и Националната гарда на Ајова, која трае уште од 2011 година.

„Посебно внимание посветивме на Албанците од Прешево, Бујановац и Медвеѓа, разгледувајќи прашања како што се нивната недоволна застапеност во јавните институции, полицијата, судството и здравствениот систем, деактивирањето на адресите на живеење, пречките за образование на албански јазик и непризнавањето на дипломите стекнати во Косово“, напиша тој.