Три ипол години откако полицијата го пронајде черепот на манекенката и инфлуенсерка Аби Чои во тенџере за супа, во Хонг Конг, денеска,22 септември, почна судењето за нејзиното убиство

Три ипол години откако полицијата го пронајде черепот на манекенката и инфлуенсерка Аби Чои во тенџере за супа, во Хонг Конг, денеска,22 септември, почна судењето за нејзиното убиство. Пред Високиот суд се нејзиниот поранешен сопруг Алекс Квонг, неговиот татко Квонг Кау и братот Ентони Квонг.

Тројцата се обвинети дека ја убиле 28-годишната Чои на 21 февруари 2023 година. Тие се товарат и за спречување законско погребување на нејзиното тело, а доколку бидат прогласени за виновни за убиството, се соочуваат со доживотен затвор.

Случајот го потресе Хонг Конг поради начинот на кој полицијата ги пронајде останките. Чои исчезнала на 21 февруари, а 3 дена подоцна истражителите влегле во куќа во Таи По. Таму откриле делови од нејзиното распарчено тело, а дел од останките биле чувани во фрижидер.

- Advertisement -

Черепот бил пронајден во голем сад за супа. Во куќата полицијата открила и алати поврзани со распарчувањето на телото, меѓу кои електрична пила и машина за сечење месо.

Само неколку дена пред исчезнувањето, Чои на Инстаграм објавувала фотографии од модни настани. Била присутна на Париската модна недела и се движела во високите модни и општествени кругови на Хонг Конг. Зад себе остави четири деца, од кои две ги имала со обвинетиот Алекс Квонг.

Истрагата во 2023 година не завршила во куќата. Полицијата пребарувала и депонија во обид да најде дополнителни останки и докази.

Поранешниот сопруг, неговиот татко и брат биле уапсени кратко по откривањето на останките. Обвинителството сега треба пред поротата да ја изложи својата верзија за тоа што се случило и доказите на кои го темели обвинението.

Судењето почна на 21 септември со прелиминарни правни прашања, а поротата не беше избрана првиот ден. Судот воведе и ограничувања за известување за оваа фаза од постапката за да не се влијае врз претстојното судење.

Интересот е огромен. Околу 100 луѓе дошле во судот или во дополнителните простории обезбедени за следење на процесот, а бил организиран и пренос за јавноста.

Процесот се очекува да трае околу 45 дена. Обвинителството допрва треба да го одржи воведното излагање пред поротата и детално да го претстави случајот против тројцата обвинети.