Гнев и солзи на плоштад во Приштина: Албанците се разочарани од пресудата против Тачи и неговите соработници

Илјадници граѓани на Косово се собраа на плоштадот „Скендербег“ во Приштина за да го следат изрекувањето на пресудата за четворица поранешни високи лидери на Ослободителната војска на Косово (ОВК) на голем екран, додека постапката се одвиваше пред Специјализираните совети на Косово во Хаг. Граѓаните емотивно реагираа додека судскиот совет во Хаг ја соопштуваше одлуката, следејќи ја секоја фаза од постапката сè до објавувањето на пресудата.

Откако Специјализираните совети им изрекоа поединечни казни на Хашим Тачи, Кадри Весели, Јакуп Красниќи и Реџеп Селими, собраните граѓани ја примија веста со запрепастеност и разочарување.

Некои беа видени со солзи во очите, разочарани од пресудите против поранешните лидери на ОВК по речиси шесте години поминати во притвор додека го чекаа завршувањето на постапката.

- Advertisement -

Плоштадите и улиците во Приштина денеска беа украсени со знамиња на ОВК, а собири на граѓани кои носеа знамиња и симболи на ОВК се одржаа и во други градови низ Косово.

Поранешниот претседател и премиер на Косово, Хашим Тачи, беше осуден на 25 години затвор за воени злосторства и злосторства против човештвото во првостепената постапка пред Специјализираните совети во Хаг. Јакуп Красниќи исто така беше осуден на 25 години, додека Кадри Весели и Реџеп Селими добија казни од 18, односно 13 години затвор. Тачи беше прогласен за виновен за злосторства што вклучуваат убиство, тортура и незаконско лишување од слобода, додека Красниќи, Весели и Селими беа прогласени за виновни за низа воени злосторства, вклучувајќи незаконско лишување од слобода, сурово постапување, тортура и убиство.

Времето поминато во притвор се засметува во овие казни.

Поддржувачи на ОВК се собраа на плоштад во Приштина.

Незадоволни од пресудата, присутните негодуваа и извикуваа „ОВК“, а потоа тргнаа во протестен марш извикувајќи „Не во мое име“.

Според медиумите во Приштина, обвиткани во албански знамиња и знамиња со ликот на Тачи и ознаките на ОВК, тие маршираа низ улиците на Приштина, при што беа активирани и пиротехнички средства.