Стерјовски: Бугарија сака Преспа, Гора и Голо Брдо, области покрај Македонија населени и со Македонци, да ги претстави како бугарски области

Бугарија сака Преспа, Гора и Голо Брдо, области покрај Македонија населени и со Македонци, да ги претстави како бугарски области, тврди претседателот на Македонската алијанса за европска интеграција, Васил Стерјовски. Тој смета дека зад политиката стојат старите „санстефански“ концепции, а како главни инструменти ги посочува бугарските пасоши, потврдите за потекло и донациите.

Стерјовски за албанската телевизија СОТ7 рече дека бугарската политика кон овие подрачја се засилила откако Бугарија стана членка на Европската Унија. Притисокот, според него, особено се зголеми пред Албанија да ги отвори пристапните преговори со ЕУ.

2017 година како пресвртна точка

Стерјовски како клучен момент го посочи признавањето на бугарското малцинство во Албанија во 2017 година. Тврди дека Софија ја условила Тирана со нејзиниот европски пат.

- Advertisement -

– Сè се направи со директен притисок врз Албанија. Или ќе признаете бугарско малцинство, или во спротивно ќе бидете блокирани на вашиот пат кон Европската Унија – изјави Стерјовски.

Бугарското малцинство тогаш влезе во албанската законска рамка со измените на Законот за заштита на националните малцинства. За измените гласаа и власта и опозицијата.

Стерјовски тврди дека дотогаш бугарско малцинство не било регистрирано во пописите во Албанија.

Пасоши, потврди и донации

Претседателот на МАЕИ тврди дека потоа почнал процес на зголемување на бројот на луѓе што се изјаснуваат како Бугари. Како еден од механизмите го посочи добивањето бугарско државјанство.

Според него, дел од локалните институции издаваат потврди за бугарско потекло за финансиски надомест. Тие документи потоа се користат при барањето бугарски пасош.

– Начинот на кој се работи е со овие методи: методот со пасошите и другите методи со овие лажни потврди што ги издаваат општините и различни донации – рече Стерјовски.

Тој нагласи дека локалните власти немаат законска надлежност да утврдуваат етничка припадност. Тврди дека ваквата документација подоцна може да послужи за прикажување поголемо бугарско малцинство.

„Да се прогласат за бугарски области“

Токму тука Стерјовски ги издвојува Преспа, Гора и Голо Брдо како главна цел на бугарската политика.

– Нивната цел е овие области што се погранични со Македонија – Преспа, Гора, Голо Брдо – каде што живее македонската заедница, да се прогласат за бугарски области – рече Стерјовски.

Тој ова го поврза со Санстефанскиот договор од 1878 година и со тогашниот проект за голема Бугарија. Според него, историските претензии на Бугарија се протегале до Корча, Подградец и до Дебар.

– Бугарско малцинство во Албанија го означува Санстефанскиот проект, Голема Бугарија сè до Корча, Подградец и до Дебар – изјави тој.

Санстефанскиот договор беше ревидиран неколку месеци подоцна со Берлинскиот конгрес. Стерјовски, сепак, смета дека концептите поврзани со него сè уште влијаат врз политиката на Софија.

– Денес ние го имаме овој проблем што го имаме како заедница, но од друга страна тоа ќе ѝ се врати како бумеранг и на албанската држава – порача Стерјовски.