Елена Рибакина е новата кралица на светскиот тенис, откако вчера официјално го обезбеди првото место на ВТА ранг-листата со пласманот во полуфиналето на Отвореното првенство на САД

Елена Рибакина е новата кралица на светскиот тенис, откако вчера официјално го обезбеди првото место на ВТА ранг-листата со пласманот во полуфиналето на Отвореното првенство на САД. Претставничката на Казахстан направи спектакуларен пресврт во Њујорк и со победата над кинеската тенисерка и олимписка шампионка Кинвен Женг од 3-6, 6-1, 6-4 стана 30-та тенисерка во историјата која се искачила на самиот тениски врв.

Со овој триумф на стадионот „Артур Еш“, Рибакина стави крај на доминацијата на Белорусинката Арина Сабаленка, која помина 99 последователни недели на првата позиција. Иако официјалното ажурирање на листата ќе се случи во понеделник по завршувањето на Ју-Ес Опен, математички никој веќе не може да ја загрози нејзината позиција.

„Ледената кралица“ се покажа во клучните моменти

Натпреварот започна со силен притисок од мотивираната Кинвен Женг, која успеа да го добие првиот сет со 6-3. Сепак, Рибакина, позната по својот мирен карактер и прекарот „ледена кралица“, покажа зошто е на врвот на тенискиот свет. Во вториот сет целосно доминираше со разорни сервиси и моќни удари од основната линија, израмнувајќи со убедливи 6-1. Решавачкиот сет донесе вистинска психолошка битка, каде што искуството на Рибакина пресуди во десеттиот гем за конечни 6-4.

- Advertisement -

И покрај историскиот успех за неа и за Казахстан, Рибакина по мечот остана приземјена и фокусирана на крајната цел во Њујорк.

– Во моментов, тоа е само бројка. Мојата главна цел е да освојувам турнири. Ова е неверојатно достигнување, но сите знаеме колку брзо работите можат да се променат во тенисот – рече таа по мечот.

Качувањето на ВТА тронот е круна на неверојатната сезона за 27-годишната тенисерка, која претходно годинава ја освои и титулата на Австралија Опен. Со повеќе од 350 асови оваа сезона, таа е најуспешниот сервер на женскиот тенис.

Во полуфиналето кое се игра веќе утре, новата светска тенисерка број еден ќе се соочи со американската суперѕвезда Коко Гоф, каде ќе се бори за место во големото финале на Ју-Ес Опен.

Во првото полуфинале ќе играат Арина Сабаленка и Џесика Пегула. Една од нив ќе оди во финале и ќе се соочи со победникот од дуелот Рибакина-Гоф.

Ривалството со Арина Сабаленка

Ривалството помеѓу Елена Рибакина и Арина Сабаленка се смета за едно од највозбудливите и најинтензивните во модерната ера на женскиот тенис. Поради нивниот агресивен стил на игра, разорните сервиси и силните удари од основната линија, медиумите често ги нарекуваат нивните дуели „судир на титаните“.

Вкупниот меѓусебен скор во нивната кариера е 10–7 во корист на Арина Сабаленка. Сепак, кога станува збор за клучните мечеви за титула, рамнотежата се менува.

Иако Сабаленка води во вкупниот број на победи, Рибакина е посупешна во директните финалиња за титула со 4–2. Таа покажа дека знае како да остане посмирена кога влогот е најголем.

Во Гранд Слем дуелите Сабаленка сè уште води со 2–1. Нивниот најсимболичен меч беше финалето на Австралија Опен во 2023 година, каде Сабаленка победи по голем пресврт (4-6, 6-3, 6-4). Сепак, Рибакина ѝ се реваншираше во големото финале на Австралија Опен во 2026 година, победувајќи ја Белорусинката во нов спектакуларен трилер со 6-4, 4-6, 6-4.

Нивните дуели сезонава дополнително го засилуваат ривалството. По триумфот на Рибакина во Мелбурн, Сабаленка успеа да врати со победи во драматичното финале во Индијан Велс (7-6, 3-6, 6-3) и во полуфиналето на Мастерсот во Мајами.