Тренерот на Реал Мадрид, Жозе Мурињо, воведе поинаков рецепт за дисциплина во соблекувалната

Тренерот на Реал Мадрид, Жозе Мурињо, воведе поинаков рецепт за дисциплина во соблекувалната. Кој ќе задоцни на тренинг може да заврши сам во теретана, наместо со соиграчите на теренот.

Мурињо се откажал од паричните казни за прекршување на дисциплината, објави британски „Сан“.

Наместо удар по џебот, фудбалерите ги чека спортска казна. Играчот што ќе задоцни може да добие индивидуален тренинг во теретана.

- Advertisement -

Казната може да биде и потешка. Според истиот извор, Мурињо може да не го вклучи фудбалерот во тимот за следниот натпревар.

Шпански „АС“ претходно објави дека правилата станале построги по доаѓањето на Португалецот. Играчите мора да пристигнат во тренинг-центарот во Валдебебас еден час пред почетокот на тренингот.

Доцнењето значи работа во теретана наместо тренинг со целата група.

Мурињо ја засилил контролата и врз закрепнувањето и исхраната на играчите. Фудбалерите мора да ја спроведуваат рехабилитацијата по повреди во клупскиот тренинг-центар.

Тоа важи и кога работат со личен тренер. Исхраната, пак, се темели врз препораките на клупските специјалисти.

Мурињо се врати во Реал Мадрид летово. Клубот на 11 јуни го објави назначувањето на 63-годишниот португалски тренер.

Неговиот договор е со важност до 30 јуни 2029 година.

Португалецот претходно го водеше Реал од 2010 до 2013 година. Со мадридскиот клуб ја освои титулата во Шпанија во сезоната 2011/12 со 100 бода.