СЕ СУДРИЈА ТОВАРНИ БРОДОВИ КАЈ ИСТАНБУЛ, ЕДНИОТ ВЕДНАШ ПОТОНА

Два трговски брода што пловеа под турско знаме се судрија ноќеска во Мраморното Море во близина на Истанбул, а со едниот од бродовите е изгубен контакт, соопшти Кабинетот на гувернерот на Истанбул.

Бродот „Алсу“ што пловел кон егејското пристаниште Алијага и бродот „Тугберк Имамоглу“ што се движел кон црноморското пристаниште Карадениз Ерегли, се судриле во близина на истанбулската населба Силиври.

На местото на несреќата се испратени бродови на крајбрежната стража и хеликоптери за пребарување и спасување. На „Алсу“ нема видливи оштетувања, но властите не успеале да воспостават контакт со „Тугберк Имамоглу“ и неговите 10 членови на екипажот. Според одредени извештаи „Тугберк Имамоглу“, кој превезувал челик, потонал неколку минути по судирот.

- Advertisement -

Според податоците на Истанбулската стопанска комора за поморска трговија, „Тугберк Имамоглу“ во сопственост на компанијата „Зејбе Денизџилик“, е брод за превоз на расфрлен товар, додека „Алсу“ е танкер за транспорт на хемиски материјали.

Потрагата и спасувачката операција се во тек.