Осум загинати и 18 исчезнати, потресно сведоштво на преживеан од траектот на Кипар

Преживеаните патници од траектот што се преврте кај брегот на северниот дел на Кипар ги опишаа драматичните моменти и паниката додека се обидувале да избегаат од бродот кој тонел.

Во несреќата загинале најмалку осум лица, додека спасувачките екипи продолжуваат да трагаат по 18 исчезнати, откако бродот со вкупно 267 патници и членови на екипажот се превртел во неделата попладне, на пат од Киренија кон турското пристаниште Ташуџу.

Серкан Кундураџи, кој се спасил така што се провлекол низ скршен прозорец, раскажал дека на околу четири наутички милји од кипарскиот брег видел луѓе кои не знаеле да пливаат и се давеле.

- Advertisement -

– Некои во паника не ги земаа појасите за спасување, а некои од страв веднаш скокнаа во морето. Имаше еден постар човек кој не успеавме да го извлечеме и се удави – раскажал Кундураџи за турската агенција DHA.

Особено потресно, како што навел, било да се гледаат многу малите деца од едно семејство како се борат за живот во морето, пренесува „The Irish Times“.

Преживеаните раскажале дека пред бродот да почне да се навалува и да прима вода слушнале неколку силни звуци кои доаѓале од долните делови на пловилото.

Кундураџи рекол дека екипажот по првите проблеми ја проверил ситуацијата и на патниците им соопштил дека „нема поголем проблем“ и дека станува збор само за олабавена заптивка која предизвикала истекување на вода.

Но, кога конечно била издадена наредба за евакуација, меѓу патниците веќе завладеала паника.

Бродот сè повеќе се навалувал во моментот кога капетанот, според сведоштвото на преживеаниот, се обидувал да се врати кон Киренија, позната и по турското име Ѓирне.

– Се слушаа толку многу врисоци, а многу луѓе останаа заробени во задниот дел од бродот. Не можеа да излезат. Телата и луѓето беа натрупани едни врз други, а најнесреќни беа оние што останаа под нив – опишал Кундураџи.

Друг преживеан, Дениз Озполат, исто така го опишал хаосот на бродот на компанијата „Filo Denizcilik“, наведувајќи дека кај излезот многу брзо се создала огромна гужва.

– Тргнавме кон излезот, но таму веќе имаше огромна маса луѓе. Не можевме да ги најдеме појасите за спасување, ни ги затворија вратите и не можевме да излеземе – рекол Озполат.

Вратите подоцна биле отворени, по што патниците почнале да скокаат во морето додека бродот се навалувал и тонел.

Некои од нив ги кршеле прозорците за да ги извлечат луѓето кои останале заробени во внатрешноста.

Озполат рекол дека во морето видел цело семејство со деца, додека преживеаните се обидувале да се оддалечат од бродот кој се превртувал.

Мухамед Озчелик, сопственик на компанија за водни спортови, бил меѓу првите спасувачи кои со својот чамец пристигнале на местото на несреќата и почнале да ги извлекуваат луѓето од морето.

– Се обидувавме да направиме повеќе отколку што можевме. Луѓето велеа: „Земете ме и мене, земете ме и мене“, но капацитетот веќе беше исполнет. Примивме дури и многу повеќе луѓе отколку што смеевме. Луѓето се бореа за живот – раскажал Озчелик.

Снимките што ги објавија турските медиуми покажуваат патници со портокалови појаси за спасување како стојат на превртениот труп на бродот и ја чекаат помошта.

Многу од нив подоцна со помали туристички чамци биле префрлени до пристаништето.

Премиерот на Северен Кипар, Унал Устел, соопштил дека е отворена истрага за несреќата и дека сите осум членови на екипажот се приведени.

– Секој аспект од овој настан ќе биде истражен. Ќе биде откриен и најмалиот пропуст. Кој и да биде прогласен за виновен или одговорен, нема да биде поштеден – порача Устел.

Во операцијата за потрага и спасување, на екипите од Северен Кипар им помагаат турската крајбрежна стража и турската војска.

Устел несреќата ја опиша како најтешката поморска катастрофа во историјата на Кипар.

Кипар е поделен по етничка линија од 1974 година. Кипарските Турци во 1983 година прогласија независност на северниот дел од островот, која ја признава единствено Турција.

Истрагата за причините за несреќата продолжува, додека спасувачките екипи продолжуваат со потрагата по исчезнатите патници.