ПОРАНЕШНИОТ СРПСКИ ФУДБАЛЕР МИЛОШЕВИЌ E УАПСЕН СО 1,5 ТОНИ КОКАИН

Поранешниот српски фудбалер Урош Милошевиќ е уапсен во Португалија откако полицијата пресретнала возило на автопатот А6 во кое биле пронајдени повеќе од 1,5 тони кокаин, објавија португалските и српските медиуми.

Португалската полиција го запрела возилото во областа Естремоз, а според податоците на локалното државно обвинителство, тоа содржело околу 1.53 тони кокаин со висока чистота. Вредноста на конфискуваната дрога е проценета на повеќе од 70 милиони евра.

Заедно со дрогата, пронајдени се и две полуавтоматски огнени оружја од воен калибар, а запленети се и возило, пари и други предмети за кои истражителите се сомневаат дека се поврзани со шверц со дрога.

- Advertisement -

Португалските власти го товарат 31-годишникот под сомнение за тешко кривично дело меѓународна трговија со дрога, злосторничко здружување и нелегално поседување оружје. По првото испрашување, тој доби притвор.

Канцеларијата на португалскиот државен обвинител не го откри идентитетот на уапсениот маж во своето соопштение, но го опиша како 31-годишен странски државјанин. Португалскиот весник „Жорнал де Нотисијас“, а потоа и бројни регионални медиуми, објавија дека станува збор за поранешниот српски фудбалер Урош Милошевиќ.

Според тие изјави, за време на неговата фудбалска кариера, Милошевиќ играл за неколку српски клубови, меѓу кои Чукарички, ИМ Раковица, Телеоптик и Синѓелиќ Белград.

Истрагата е дел од поширока акција насочена кон криминална група осомничена за транспорт на големи количини кокаин по море и влегување во Европа преку Португалија.

Португалските истражители продолжуваат да работат на случајот и се обидуваат да ја утврдат улогата на осомничениот во криминалната мрежа и да идентификуваат други лица поврзани со шверц.