Три пожари на отворен простор во земјава и натаму се активни, додека два се ставени под контрола, а уште два се изгаснати

Три пожари на отворен простор во земјава и натаму се активни, додека два се ставени под контрола, а уште два се изгаснати, информира Центарот за управување со кризи (ЦУК).

До 13 часот денеска се регистрирани вкупно седум пожари на отворен простор.

Активен е пожарот во Штипско, каде што гори ниска вегетација во атарот на селото Лакавица. Пожар има и во Македонски Брод, на местото викано Видуш, во близина на селото Драгов Дол, каде што огнот зафатил сува трева, нискостеблеста шума и грмушки.

- Advertisement -

Третиот активен пожар е на воениот полигон Криволак во Општина Неготино, каде што гори ниска вегетација.

Под контрола се пожарите во Крива Паланка, на излезот од градот, каде што гори депонија, како и пожарот на градската депонија во Делчево.

Во меѓувреме, два пожари се ставени под целосна контрола и се изгаснати. Едниот бил на патот пред РЕК „Битола“ во Општина Новаци, каде што горела ниска вегетација, а другиот во местото викано Кулата во Велес, каде што огнот зафатил поретка нискостеблеста шума и сува трева.

Од ЦУК продолжуваат да ја следат состојбата на теренот, особено на местата каде што пожарите сè уште се активни.