Поранешни вработени укажувале на интензивно темпо на операции и долготрајни дежурства

Американската сајбер-команда покрена истрага по серијата од пет смртни случаи на нејзини припадници и лица кои тесно соработувале со таа воена единица.

Петте смртни случаи регистрирани во периодот од почетокот на јуни до почетокот на јули предизвикаа загриженост во воениот врв и во Конгресот, а раководството на Сајбер-командата ситуацијата ја третира како таканаречен „кластер на самоубиства“, што подразбира примена на посебни процедури за утврдување на околностите и преземање превентивни мерки.

Според извештајот, командантот на единицата уште во јуни ги известил вработените за три смртни случаи, а потоа биле регистрирани уште два.

- Advertisement -

Сајбер-командата спаѓа меѓу најчувствителните структури на американскиот воен и разузнавачки систем. Нејзините припадници се задолжени за заштита на американските воени и други критични мрежи, но и за спроведување сајбер-операции во странство.

Генералот Џошуа Руд е командант на Сајбер-командата и истовремено директор на Агенцијата за национална безбедност, што го покажува значењето што Вашингтон му го придава на тој сегмент од националната безбедност.

Иако поединечните околности на смртните случаи сѐ уште се испитуваат, последната криза повторно го отвори прашањето за условите во кои работат американските воени сајбер-експерти. Поранешни вработени укажуваат на хроничен недостиг на кадар, исклучително интензивно темпо на операции и долготрајни дежурства во строго обезбедени работни простории.

Притисокот врз американските сајбер-сили дополнително е зголемен со проширувањето на воените и разузнавачките операции, како и со забрзаната трка во развојот и примената на вештачката интелигенција во сајбер-војувањето. Според извори на кои се повикуваат агенциите, особено е оптоварена Националната единица за сајбер-мисии, која директно ги поддржува американските операции во странство.

Проблемот, сепак, бил познат и пред последната серија случаи. Раководството на Сајбер-командата побарало од Конгресот дополнителни 11 милиони долари за програми насочени кон процена и зајакнување на психолошката, когнитивната и физичката отпорност на припадниците на сајбер-силите.

Генералот Руд предупредил дека недостигот од целни инвестиции може да го зголеми ризикот од преоптовареност на вработените и негативно да се одрази врз оперативната подготвеност на единицата.

По последните настани надзорот го засилил и Конгресот. Сенатскиот комитет за вооружени сили го разгледува прашањето за ресурсите и поддршката за Сајбер-командата, додека соодветниот комитет на Претставничкиот дом побара од Пентагон посебно информирање за ситуацијата и мерките што се преземаат.

Случајот, освен прашањето за менталното здравје на припадниците на една од најзатворените американски воени структури, го отвори и поширокото прашање колку долго Сајбер-командата може да го одржува зголеменото темпо на операции без дополнителен кадар и посилни програми за поддршка на вработените.