Вашингтон нема целосно да се посвети на преговорите со Техеран

Американскиот претседател Доналд Трамп ја минимизира важноста на повторното отворање на Ормускиот Теснец, додека дипломатски договор со Иран сè уште нема, објави американскиот портал Аксиос.

– Не ѝ придаваме преголемо значење. САД нема целосно да се посветат на преговорите со Иран. Со нив преговараме само делумно. Само го набљудуваме Иран со неговата огромна инфлација и фактот дека нема пари – вели Трамп за Аксиос.

Трамп истакна дека американската поморска блокада на иранските пристаништа ја влошила финансиската ситуација.

- Advertisement -

– Сè ќе се реши. Секогаш се решава. Тоа е како шаховска партија – вели Трамп во врска со преговорите со Иран.

„Аксиос“ пренесува и изјави на американски официјални лица кои тврдат дека претседателот е фокусиран на деескалација.

Израелскиот експерт за Иран, Дени Цитринович, на социјалната мрежа Икс напиша дека економската состојба во Иран несомнено е лоша, но дека е малку веројатно економскиот притисок сам по себе да го принуди Техеран да капитулира на преговарачката маса или да се откаже од клучните стратешки интереси, како што е барањето за контрола над Ормус.

Иран во последните денови ги намали очекувањата за брзо повторно отворање на клучниот поморски пат. Иранското раководство побара од САД значителни отстапки однапред пред деблокирањето на теснецот, кој е од клучно значење за меѓународната трговија со нафта и гас.

Иранскиот Врховен совет за национална безбедност повторното отворање на теснецот го поврза со неколку услови, меѓу кои укинување на американската поморска блокада, повлекување на американските сили од регионот, целосно укинување на сите санкции против Иран и безусловно ослободување на целиот замрзнат ирански имот.