ТРЕТО ВОЗИЛО ГО ПРЕДИЗВИКАЛО СУДИРОТ ВО КОЈ ЗАГИНА 19-ГОДИШНИОТ МОТОЦИКЛИСТ

Полицијата уапси возач на автомобил кој учествувал во тешката сообраќајна несреќа во која вчера во Бутел загина 19-годишен мотоциклист. Тој немал контакт со мотоциклот и со автомобилот кои се судрија, но е дел од причините за несреќата.

По преземени мерки и активности, СВР Скопје лиши од слобода едно лице во врска со сообраќајната несреќа во Скопје во која вчера загина 19-годишен мотоциклист од скопско, соопшти денеска МВР.

„На 7.8.2026 во 12:12 часот во СВР Скопје е пријавено дека на улицата Радишанска во Скопје се случила сообраќајна несреќа помеѓу патничко возило „алфа ромео“ со италијански регистарски ознаки, управувано од С.Б.(47) од Скопје со привремен престој во Скопје и мотоцикл „кавасаки“ со скопски регистарски таблички, управуван од Н.М.(19) од село Побожје, скопско. Од здобиените повреди на местото на несреќата починал мотоциклистот Н.М.. Лекар од Итна медицинска помош констатирал смрт, а по наредба на јавен обвинител телото на починатиот било дадено на обдукција“, соопшти полицијата.

- Advertisement -

Со телесни повреди се здобил возачот С.Б., констатирани во ЈЗУ „Св.Наум Охридски“, се додава во соопштението.

„За време на вршење на увидот и по преземени мерки и обезбеден видео запис дојдено е до сознание дека во предизвикување на несреќата, но без физички контакт, учествува и патничко возило „сеат алтеа“ со скопски регистарски ознаки, по што возачот со возилото го напуштил местото без да им укаже помош на повредените. По дополнително преземени мерки, околу 19:40 часот во селото Арачиново, скопско, пронајдено е возилото и возачот С.О.(46) од Арачиново. Тој е лишен од слобода, спроведен е во полициска станица и со него е извршен службен разговор. По целосно документирање на случајот, ќе биде поднесена соодветна пријава“, соопшти полицијата.