Данската принцеза Изабела официјално ја почна својата 11-месечна воена служба во елитниот Гардиски хусарски полк во Слагелсе

Данската принцеза Изабела официјално ја почна својата 11-месечна воена служба во елитниот Гардиски хусарски полк во Слагелсе. Деветнаесетгодишната ќерка на кралот Фредерик X и на кралицата Мери ја продолжува долгогодишната традиција членовите на данското кралско семејство да служат во вооружените сили. Таа е и меѓу првите жени што ја извршуваат новата, продолжена форма на задолжителна воена служба во Данска.

Во касарната Изабела пристигна без посебен церемонијал, носејќи само спортска торба, а кралскиот двор соопшти дека, како и нејзиниот постар брат Кристијан, се откажала од надоместокот што им следува на регрутите. Со тој потег испрати порака дека сака да ја мине обуката под исти услови како и другите млади војници.

Најблискиот пример за неа е престолонаследникот, принцот Кристијан, кој основната воена обука ја заврши во истата касарна во Слагелсе. По регрутскиот рок тој продолжи на офицерска обука за поручник, а од ова лето е предвидено да командува со вод регрути во Кралската гарда.

- Advertisement -

Воената традиција во данското кралско семејство е многу постара. Кралот Фредерик X, додека беше престолонаследник, помина обука во копнената војска, морнарицата и во воздухопловството. Подоцна служеше и во елитните специјални единици на данската морнарица, што му донесе репутација на еден од најподготвените европски престолонаследници.

И неговата мајка, поранешната кралица Маргрете II, беше силно поврзана со вооружените сили. Како шеф на државата со децении ја извршуваше функцијата врховен командант на данската војска, редовно присуствуваше на воени вежби, инспекции и церемонии и уживаше голем авторитет меѓу припадниците на армијата.

Почетокот на службата на принцезата Изабела се совпаѓа со големите промени што Данска ги воведува во системот на воена обврска. Поради влошената безбедносна состојба во Европа, земјата ја прошири обврската и на жените, а времетраењето на регрутскиот рок го зголеми од 4 на 11 месеци. Планот е до 2033 година значително да се зголеми бројот на млади кои секоја година ќе минуваат низ воена обука.

Во Данска одамна се смета дека идните владетели треба лично да го запознаат функционирањето на вооружените сили, а не само формално да ја носат титулата врховен командант. Затоа воената обука е речиси неизбежен дел од образованието на членовите на кралското семејство, особено на оние што се во линијата за наследување на престолот.