ПО ГРАЃАНСКИТЕ ОБВРЗНИЦИ, ХРВАТСКА ВОВЕДУВА И НАЦИОНАЛНА ИНВЕСТИЦИСКА СМЕТКА

Хрватска воведува национална инвестициска сметка, преку која граѓаните кои ќе ја отворат ќе можат да инвестираат во финансиски инструменти со даночни олеснувања и минимални административни такси.

Предлог законот со кој се воведува овој вид на финансиски инструмент е даден на расправа.

Хрватската инвестициска сметка е посебна лична сметка, а не обична трансакциска сметка која ќе може да се отвори кај посредници – банки, инвестициски компании итн.

- Advertisement -

Според предлогот, секој возрасен граѓанин може да отвори Хрватска инвестициска сметка (ХРИ), дури и за своите малолетни деца. Тие  ќе можат да отворат само една таква лична сметка на свое име, со ограничување од 200.000 евра во текот на целиот свој живот (или до смртта), а доколку континуирано уплаќаат пари на таа сметка во текот на пет години и не ги подигнуваат, тогаш таа граница се зголемува за 50.000 евра, односно на вкупно 250.000 евра.

Без оглед на тоа каков принос ќе остварат од своите инвестиции, граѓаните кои ќе ја поседуваат оваа сметка нема да плаќаат даноци, со тоа што приносите не се одземаат од вкупните 200.000 евра што можат да се уплатат во текот на нивниот живот, а тој износ не може да се надмине, бидејќи во спротивно ќе бидат предупредени за тоа од посредникот кај кого ја отвориле сметката.

Граѓанинот  ќе може да побара исплата на средствата во секое време, а плаќањата се ослободени од оданочување.

Сопствениците на сметките самите можат да изберат во што ќе се инвестираат парите што ги уплатиле на таа сметка, или, доколку сакаат, нивните медијатори ќе го изберат тоа за нив во договорот.

Претставувајќи го предлогот за тој закон, државниот секретар во Министерството за финансии, Матеј Буле, нагласи дека тоа е новина во хрватскиот финансиски систем, во согласност со стратегијата за развој на пазарот на капитал и препораките на ЕУ, но и резултат на силната хрватска економија и напредокот на пазарот на капитал и финансиската писменост.

– По важност, оваа мерка оди заедно со државните или националните обврзници, за кои граѓаните покажаа голем интерес и за кои се реализирани околу 16 милијарди евра во 20 емисии. Ова е чекор понатаму, така што граѓаните можат да имаат корист и од растот на хрватската економија преку инвестирање во акции на домашни компании преку оваа сметка, а исто така е обврска 20 проценти од нивните инвестиции да бидат во домашни компании кои се котирани на берзата – рече Буле.

Нацрт-законот е во јавна консултација до 23 август, а се очекува дека би можел да стапи во сила на 1 јануари 2027 година.

Досега во ЕУ  12 земји вовеле или се во процес на воведување ваков закон за развој на пазарот на капитал.