Краткиот, но силен едночасовен дожд вчера поплави повеќе улици во реонот зад Здравствениот дом во центарот на Битола

Краткиот, но силен едночасовен дожд вчера поплави повеќе улици во реонот зад Здравствениот дом во центарот на Битола. Надојдената вода носеше земја и камења, поради што беа блокирани делови од улиците, а пријавени се и поплавени објекти и оштетени возила.

Најпогодена беше улицата Дебарска, каде на одредени места се појавија оштетувања на коловозот. Жителите посочуваат дека водата и наносите се слеале кон пониските улици.

По невремето, екипи на локалната самоуправа и јавните претпријатија излегоа на терен и почнаа со расчистување на камењата, земјата и одводните шахти.

- Advertisement -

Од Регионалниот центар за управување со кризи соопштија дека поројниот дожд траел околу еден час и поплавил куќи, дворови и помошни простории на повеќе локации во Битола. Во расчистувањето и испумпувањето на водата се вклучени ЈП „Нискоградба“, другите јавни претпријатија и Територијалната противпожарна единица.