Словенецот Славко Винчиќ се расплака кога слушна дека ФИФА му ја доверила најважната судиска задача во кариерата, финалето на Светското првенство меѓу Шпанија и Аргентина. Четириесетишестгодишниот арбитер зад себе веќе има финале во Лигата на шампионите и богата меѓународна кариера, но назначувањето за мундијалското финале очигледно силно го погодило.
Одлуката ја соопшти Пјерлуиџи Колина, легендарниот италијански судија кого многумина го сметаат за најпознат и најпочитуван арбитер во историјата на фудбалот.
Словенецот Винчиќ важи за „тврд орев“. На клупскиот Мундијал во 2025 покажа девет жолти и еден црвен картон на мечот Ривер Плата – Монтереј, што многумина го опишаа како доказ дека не се плаши да носи тешки одлуки.
На актуелниот Мундијал, пак, тој веќе ги судеше натпреварите Бразил – Мароко, Јордан – Алжир и осминафиналниот дуел меѓу Мексико и Еквадор.
Од инженер до финале на ЛШ, па до Мундијал
Малкумина знаат дека Винчиќ по професија е инженер по телекомуникации. Кариерата ја почнал како дополнителен судија во тимот на прославениот словенечки арбитер Дамир Скомина, а со текот на годините се проби меѓу најценетите европски судии.
Словенецот е интернационален судија на ФИФА од 2010 година, а европската јавност добро го памети по финалето на Лигата на шампионите во 2024 година, кога ја делеше правдата на дуелот меѓу Реал Мадрид и Борусија Дортмунд.
Претходно беше главен судија и на финалето во Лига Европа во 2022 година, а судеше и на Европските и на Светските првенства.
Во 2020 година се најде во полициска акција
Името на Винчиќ се најде во светските медиуми и во 2020 година, кога беше приведен за време на полициска акција во Босна и Херцеговина насочена кон криминална група поврзана со проституција и дрога.
Набргу беше ослободен, а истражните органи утврдија дека не бил поврзан со случајот и против него не беше поведена постапка. Самиот Винчиќ тогаш изјави дека се нашол „на погрешно место во погрешно време“.
На неделното финале ќе му асистираат неговите сонародници Томаж Кланчник и Андраж Ковачиќ, додека четврти судија ќе биде Јорданецот Адам Махадмех.
