ЗЕЛЕНСКИ ГО РАЗРЕШИ МИНИСТЕРОТ ЗА ОДБРАНА И МУ ПОНУДИ СОВЕТНИЧКО МЕСТО

По ненадејното разрешување од министерската позиција за одбрана во владата на Украина, Михајло Федоров денеска на прес-конференција ги разоткри превирањата и конфликтите во самиот врв на украинската влада и армијата.

Федоров, потврди дека Зеленски му понудил да остане во тимот како претседателски советник, што тој го одбил.

-Вчера имав искрен разговор со претседателот. Тој ми ја понуди улогата на советник или да најдеме друг начин да останеме во тимот. Јас одбив. Мојата цел никогаш не беше да станам министер, да останам министер или да се натпреварувам за позиции – рече Федоров, додавајќи дека Зеленски јасно донел одлука однапред да го отпушти.

- Advertisement -

Најшокантниот дел од излагањето на Федоров, според оценките на медиумите, е признанието дека во изминатиот период тој имал отворен конфликт со врховниот командант на украинската армија, генералот Олександр Сирски.

Федоров откри дека претходно му предложил на Зеленски да го разреши генералот, што претседателот го одбил. После тоа, Сирски возврати и му издаде ултиматум на Зеленски – побара итно разрешување на министерот за одбрана.

-Кога претседателот рече дека не планира да го замени Сирски, се согласив и реков дека ќе научам да соработувам со него. Сепак, наидовме на целосна опструкција на сите наши иницијативи. Сирски не е подготвен отворено да решава проблеми, се чинеше дека е повеќе загрижен за оние кои наводно заговоруваат против него – рече Федоров.

Поранешниот министер не го поштеди својот до неодамна колега.

– Наместо да смисли како асиметрично да ја победи Русија, тој смисли како да ја подели земјата. Сирски ја спаси земјата во 2022 година кога ја водеше одбраната на Киев. Но, војната се промени, а Сирски не се менува со неа.

Разрешувањето на Федоров е дел од поширок политички пресврт во Киев по оставнакта на премиерката Јулија Свириденко.

И додека изворите тврдат дека Федоров формално останува дел од претседателскиот тим и дека неговата идна судбина ќе биде појасна следната недела, протести во поддршка на разрешениот министер за одбрана избувнаа на улиците на Киев и другите украински градови.