Гимназијата „Вефлен“ во баварскиот град Шонгау беше сцена на крвав напад, откако 16-годишен Хрват тешко повредил две 13-годишни девојчиња

Гимназијата „Вефлен“ во баварскиот град Шонгау беше сцена на крвав напад, откако 16-годишен Хрват тешко повредил две 13-годишни девојчиња.

Според германските медиуми, напаѓачот, поранешен ученик во училиштето, прво се обидел да употреби пиштол. Кога оружјето не испукало, извадил нож и ги нападнал девојчињата во училишниот двор, пишува Дојче Веле.

Едната ученичка поради сериозноста на повредите била префрлена во болница со хеликоптер, но според властите, двете се надвор од животна опасност.

- Advertisement -

Баварскиот министер за внатрешни работи Јоаким Херман изјави дека засега нема индиции оти во нападот учествувало уште едно лице.

– Претпоставуваме дека имало еден напаѓач кој имал нож и огнено оружје – изјави Херман.

Според неговите информации, осомничениот претходно бил на психијатриски третман, а истрагата треба да утврди дали постоела каква било врска меѓу него и повредените девојчиња.

Баварскиот премиер Маркус Зедер изрази сочувство и поддршка за учениците, наставниците и семејствата погодени од нападот.

– Во овие тешки времиња, сите сме заедно – порача Зедер.