ЗАТВОРЕН ИНТЕРНАТОТ КАДЕШТО ПАРИС ХИЛТОН БИЛА ЗЛОСТАВУВАНА КАКО ТИНЕЈЏЕРКА

Парис Хилтон издаде трогателна изјава откако интернатот што го посетувала како тинејџерка беше затворен поради обвинувања за злоставување. Министерството за здравство и човечки услуги на Јута ја одзеде лиценцата на кампусот на училиштето Прово Кањон во Спрингвил, центар за бихејвиорално лекување за адолесценти, бидејќи установата не успеала да ги обезбеди потребните здравствени и безбедносни услуги за своите штитеници.

Коментирајќи го затворањето на училиштето, Хилтон напиша на социјалните медиуми X:

– Чекав со години да го напишам ова. Местото кое ми наштети мене и на безброј деца пред и по мене повеќе нема да може да работи. Децата што беа таму ќе бидат преместени. Мојот сон да ги заштитам идните генерации од злоставувањето што го доживеав конечно се остварува.

- Advertisement -

Повеќе од педесет години, децата раскажуваат приказни за злоупотреба, занемарување и траума. Јас бев едно од тие деца. Знам какво е да се бара помош и да се верува дека никој нема да дојде. Денес, децата што сè уште се во таа институција знаат дека некој конечно доаѓа да ги заштити – вели таа во изјавата.

Хилтон првпат зборуваше за наводната злоупотреба што ја доживеала во нејзиниот документарец од 2020 година „Ова е Париз“. Таа поминала 11 месеци во интернатот кога имала 17 години и тврди дека била ментално и физички злоупотребена од персоналот на институцијата, објавува Unilad.

Сведочејќи пред одборот на Сенатот во Капитолот на Јута во 2021 година, таа рече:

– Не можев да го пријавам злоупотребувањето бидејќи целата комуникација со моето семејство беше следена и цензурирана. Она што е одвратно е што програмата не само што ја цензурира комуникацијата со семејството, туку и со целиот надворешен свет, па затоа немавме начин да повикаме помош.

Документите од 2025 година тврдат дека објектот не обезбедил доволен персонал за бројот на штитеници, користел непотребни средства за ограничување на движењето и агресивен физички контакт и ја занемарувал грижата, меѓу другите обвинувања.

Државните здравствени службеници веќе воведоа привремени ограничувања на објектот во мај откако персоналот наводно не побарал итна медицинска помош за ученик кој претрпел сериозни повреди. Училиштето сега има 15 дена да побара сослушување пред Министерството за здравство и социјални услуги.