Од денес, Европската Унија воведува привремена царина од три евра за пратки со ниска вредност што се увезуваат од земји надвор од ЕУ, главно преку онлајн купување

Од денес, Европската Унија воведува привремена царина од три евра за пратки со ниска вредност што се увезуваат од земји надвор од ЕУ, главно преку онлајн купување.

Мерката ќе се применува на производи во вредност до 150 евра, вклучувајќи облека, играчки, електроника и други стоки за широка потрошувачка што најчесто се купуваат преку интернет.

ЕУ наведува дека секој ден милиони пакети со ниска вредност влегуваат на европскиот пазар, при што многу од нив содржат производи што не ги исполнуваат безбедносните стандарди на Унијата или се потценети и лажно декларирани со цел да се избегнат царински давачки, објави Фена.

- Advertisement -

Исто така, се истакнува дека постојното ослободување од царински давачки им дава неправедна предност на продавачите надвор од ЕУ во споредба со компаниите што произведуваат или продаваат стоки во рамките на Унијата.

Новата царина ќе се применува по ставка, врз основа на тарифната класификација, а не според количината на купени производи. Ова значи дека, на пример, на пет маички ќе им се наплати царина од три евра, бидејќи припаѓаат на истата тарифна класификација, додека на три маички и еден часовник ќе им се наплати шест евра, бидејќи станува збор за две различни тарифни класификации.

Продавачот или увозникот ќе биде одговорен за пријавување и плаќање на царината како дел од царинската постапка, наведува ЕК.

Со воведувањето на новата мерка, ЕУ сака да обезбеди пофер конкуренција за европските компании, подобро да ги заштити потрошувачите од небезбедни производи, да се бори против царинските измами и да ги намали негативните последици од масовниот транспорт врз животната средина.

Во исто време, Европската Унија работи на модернизација на царинските постапки со цел зајакнување на единствениот пазар и обезбедување еднакви услови за сите компании што продаваат стоки на пазарот на ЕУ.