Шести ден без струја во студентскиот дом „Никола Карев“ во Охрид, се соочуваат и со задоцнети плати на вработените

Студентите сместени во студентскиот дом „Никола Карев“ во Охрид веќе шести ден се без електрична енергија, а проблемот со основните услови за живот трае многу подолго, бидејќи со недели претходно немале ниту топла вода.

Студентската група „Студентарија“ реагираше на состојбата, посочувајќи дека таа сериозно ги нарушува основните услови за живот и престој во домот. Според нив, до овој момент нема никаква официјална реакција ниту од раководството на установата, ниту од Министерството за образование и наука.

Од студентската група истакнуваат дека покрај недостатокот на топла вода, кој траел со недели, студентите сега се соочуваат и со дополнителни сериозни проблеми поврзани со основните животни услови. И покрај тежината на ситуацијата, надлежните институции и понатаму немаат изнесено став или преземено конкретни мерки.

- Advertisement -

Апелот на „Студентарија“ е институциите итно да реагираат и да преземат мерки за нормализирање на условите во студентскиот дом, бидејќи, како што нагласуваат, станува збор за основни услови за достоинствен живот на студентите. До јавноста се доставени и фотографии кои, наводно, ја прикажуваат моменталната состојба во домот.

Проблемите со кои се соочува студентскиот дом „Никола Карев“ во Охрид, не се однесуваат единствено на лошите услови за живеење на студентите, туку и на финансиската нестабилност на самата установа. Според незадоволството изразено и од страна на вработените, домот континуирано доцни со исплатата на платите. Особено критичен бил периодот веднаш по новогодишните празници, кога персоналот чекал цели два месеци за да добие заработени средства. Како причина за задоцнетата исплата, раководството наведувало дека установата била блокирана од добавувач на нафта, што директно се одразило врз редовното финансирање и врз навременото исполнување на обврските кон вработените.

Целата ситуација, како во делот на инфраструктурните проблеми, така и во делот на финансиското работење, наметнува потреба од итна институционална реакција, со цел да се обезбедат нормални услови за живот на студентите и навремена исплата на платите на вработените во домот.

С.Денесовски