Познатиот ТВ водител Џереми Кларксон откри дека има агресивен рак

Британскиот ТВ водител Џереми Кларксон откри дека му е дијагностициран рак, како што е прикажано во најновата сезона на „Фармата на Кларксон“.

Во една од епизодите, 66-годишниот Кларксон разговара со Кејлеб Купер и Чарли Ирланд и открива дека има „агресивна“, но во рана фаза форма на рак. Тој не прецизираше за каков вид рак станува збор, но рече дека дел од неговата простата е отстранет како дел од третманот.

„Пред неколку недели направив биопсија. Тоа е рак, агресивен е, но беше откриен многу рано“, рече Џереми Кларксон, додавајќи дека знае за дијагнозата од мај.

- Advertisement -

Тој им кажал на колегите дека ќе биде добро, иако ќе биде отсутен од работа некое време, објавува Би-Би-Си.

Здравствените проблеми веќе беа една од темите на петтата сезона од серијата. Кларксон претходно зборуваше за срцева процедура на која се подложил во октомври 2024 година, кога му бил вграден стент откако лекарите откриле сериозни блокади во неговите артерии.

Неколку часа пред објавувањето на последните епизоди од новата сезона, тој ги предупреди гледачите на Инстаграм дека ќе бидат „тешки за гледање“.

Кларксон е еден од најпознатите британски телевизиски презентери. Тој се здоби со меѓународна слава како лице на „Топ Гир“, а подоцна беше домаќин на „Големата турнеја“ на Амазон со Ричард Хамонд и Џејмс Меј. Од 2021 година, тој е ѕвезда на документарната серија „Фармата на Кларксон“, која го следи неговиот живот и работа на фарма во Котсволдс, а денес е водител и на популарното квиз шоу „Кој сака да биде милионер?“.