Русија изврши нов масовен напад врз Киев со ракети и беспилотни летала

Русија изврши нов масовен напад врз Киев со ракети и беспилотни летала. Беше погодена и Киево-Печерската лавра, еден од најпрепознатливите симболи на украинската духовност и култура.

Според украинските власти, најмалку 4 лица загинале, а 23 се повредени, меѓу нив дете и бремена жена.

Нападнати биле и повеќе станбени згради во различни делови на главниот град.

- Advertisement -

– Гори покривот на едно од најсветите места во христијанскиот свет. Ова е уште едно руско злосторство против човештвото, историјата и христијанството – порача митрополитот Епифаниј, поглавар на Православната црква на Украина.

Според украинските воздухопловни сили, Русија лансирала повеќе од 50 ракети, меѓу кои и хиперсонични ракети „Циркон“, како и речиси 500 дронови.

Градските власти соопштија дека биле погодени повеќе од 50 локации низ Киев. Избувнале десетици пожари, а околу 140.000 корисници останале без електрична енергија.

Напади биле регистрирани и во Харков, каде загинале 5 припадници на службите за итни случаи.

Киево-Печерската лавра е манастирски комплекс основан во 11 век и се наоѓа на листата на светско наследство на УНЕСКО. Ова е втор пат од почетокот на руската инвазија комплексот да биде погоден и само трет пат од Втората светска војна наваму.