КУВАЈТ МОЖЕ ДА ВРАТИ 70% ОД ПРОИЗВОДСТВОТО НА НАФТА ЗА ДВА МЕСЕЦА

По отворањето на Ормускиот теснец, Кувајт би можел да врати речиси 70% од производството на нафта во рок од најмногу осум недели, изјави  шеикот Халед Ахмад Ал-Сабах, директор за меѓународен маркетинг во државната нафтена компанија Кувајт Петролеум Корпорејшн (KPC).

-Останатите 30% од производството би можеле да се вратат на нормално ниво околу еден месец подоцна – рече Ал-Сабах на конференцијата за нафта и гас организирана од S&P Global Energy.

Компанијата има капацитети за преработка од околу 1,4 милиони барели дневно.

- Advertisement -

Поради нападот на САД и Израел, Иран ја презеде контролата врз Ормускиот теснец, забранувајќи го транзитот на бродови поврзани со САД, Израел и нивните сојузници. Бродовите од „пријателски“ земји минуваат низ теснецот во координација со иранската војска.

Од друга страна, САД ги блокираа иранските пристаништа во Оманскиот Залив и Арапското Море, незадоволни од преговорите за завршување на војната.

Вашингтон и Техеран сега разменуваат пораки, воспоставувајќи ја рамката на мировен договор што треба да го вклучи статусот на Хормуз. Техеран веќе нагласи дека преговара со Оман за механизам за управување.

Договор сè уште не е на повидок, а Меѓународната агенција за енергија (ИЕА) предупреди дека дури и ако конфликтот заврши уште во јуни, понудата на светскиот пазар „значително“ ќе заостанува зад побарувачката „барем до октомври“.

Раководителот на одделот за нафтена индустрија и пазар на ИЕА, Торил Босони, процени дека, во најдобар случај, и со постигнат договор, закрепнувањето би можело да трае од шест до осум месеци.