KAKO ОБОЖАВАТЕЛИТЕ ГО ПРОСЛАВИЈА 100-ТИОТ РОДЕНДЕН НА МЕРИЛИН МОНРО

Мерилин Монро е сè уште едно од најпрепознатливите лица во историјата на Холивуд. Речиси шест децении по нејзината смрт, нејзиното име и понатаму предивикува фасцинација, а по повод 100-годишнината од нејзиното раѓање, повторно се зборува за животот на жената која од сиромашно девојче од Лос Анџелес стана најголем секс симбол на 20 век.

Филмската кариера на Мерилин Монро траеше само околу 16 години, но таа остави неизбришлив впечаток во поп-културата што сè уште се чувствува денес, а вчера (01.јуни) беше прославено она што ќе беше нејзиниот 100-ти роденден.

Музејот на филмската академија отвори нова изложба „Мерилин Монро: Холивудска икона“ на која се прикажани некои од нејзините најпознати костими на екранот, фотографии и лични предмети. Во меѓувреме, во Палм Спрингс, обожавателите го срушија светскиот рекорд за најголем собир на двојници на Мерилин.

- Advertisement -

Како изгледаше тоа погледнете во видеото подолу.

За животот и кариерата

Родена како Норма Џин Мортенсон на 1 јуни 1926 година во Лос Анџелес, Мерилин никогаш не го запознала својот татко, а нејзината мајка Гледис Бејкер се борела со тешки проблеми со менталното здравје. Нејзиното детство било обележано со растење во згрижувачки семејства и сиропиталишта, а подоцна признала дека токму тогаш доживеала бројни трауми што ја придружувале во текот на целиот живот.

За да избегне враќање во сиропиталиштето, се омажила за Џејмс Доерти на само 16 години. Додека нејзиниот сопруг служел во војска за време на Втората светска војна, Норма Џин работела во фабрика за муниција. Таму ја забележал воен фотограф кој фотографирал жени на работа во врска со војната. Фотографиите ѝ ја отвориле вратата кон нејзината кариера како модел, а наскоро го потпишала својот прв договор со филмското студио 20th Century Fox и го зела сценското име Мерилин Монро.

Почетокот на нејзината кариера не бил гламурозен. Добивала мали и речиси незабележителни улоги, но со комбинација од убавина, харизма и природен шарм, брзо го привлекла вниманието на продуцентите. Нејзиниот вистински пробив се случил на почетокот на 1950-тите со филмовите „Нијагара“, „Џентлмените претпочитаат русокоси“ и „Како да се омажите за милионер“, по што станала една од најголемите ѕвезди во Холивуд.

Таа е особено запаметена по култната сцена од филмот „Седум години верност“, во која ветерот ѝ го крева нејзиниот бел фустан додека таа стои над вентилацискиот отвор на метрото во Њујорк. Фотографијата од таа сцена стана една од најпознатите во историјата на киното.

Иако јавноста ја гледаше како заводничка и безгрижна русокоса, Мерилин целиот свој живот се бореше со стереотипите. Таа сакаше сериозни актерски улоги, па затоа основа своја продуцентска компанија и ја усоврши својата глума во Њујорк. Критичарите особено го пофалија нејзиниот талент во филмовите „Автобуска станица“, „Некои го сакаат жешко“ и „Неприлагодените“, кои денес се сметаат за врв на нејзината кариера.

Љубовниот живот на Мерилин

Но, колку што многу се пишуваше за нејзините филмови, толку многу се пишуваше за нејзиниот љубовен живот. Нејзиниот прв брак со Џејмс Доерти заврши со развод откако нејзината кариера тргна по нагорна линија.

Во 1954 година, таа се омажи за легендарниот бејзбол играч Џо Димаџо, но бракот траеше само девет месеци. Димаџо наводно никогаш не можел да го прифати нивото на внимание што го привлекувала Мерилин, а снимањето на сцената со лелеавиот фустан често се наведувало како една од причините за нивните расправии.

Потоа следел нејзиниот брак со познатиот драматург Артур Милер, автор на класикот „Смртта на трговскиот патник“. На почетокот, тие биле нарекувани интелектуален пар на Холивуд, но дури и оваа врска не можела да го издржи притисокот на славата, медиумите и личните проблеми на Мерилин.

Најголемата контроверзност била предизвикана од гласините за нејзините врски со браќата Кенеди. Со децении се шпекулира за нејзината врска со американскиот претседател Џон Ф. Кенеди, како и со неговиот брат Роберт Кенеди. Нејзиниот сензуален настап на роденденската забава на претседателот во 1962 година, кога ја отпеала легендарната „Среќен роденден, господине претседателе“, е особено незаборавен. Овој настап е сè уште еден од најпознатите моменти во американската поп-култура.

Здравствени проблеми, осаменост, смрт

Последните години од нејзиниот живот биле обележани со здравствени проблеми, несоница, зависност од дрога и зголемена осаменост. И покрај нејзината слава и богатство, таа често велела дека се чувствувала погрешно разбрана и осамено. На 5 август 1962 година, таа беше пронајдена мртва во својот дом во Лос Анџелес. Имаше само 36 години.

Официјалната причина за смртта беше предозирање со барбитурати, но околностите на нејзината смрт никогаш не беа целосно разјаснети. Во текот на децениите се појавија бројни теории на заговор, во кои беа вклучени Кенедиеви, ФБИ, мафијата и наводно прикривање на вистината. Затоа нејзината смрт останува една од најголемите мистерии во Холивуд. Дури и денес, речиси сто години по нејзиното раѓање, Мерилин Монро останува симбол на гламур, убавина и американски сон. Нејзината животна приказна, обележана со сиромаштија, слава, љубовни скандали, трагедии и мистерии, продолжува да ги фасцинира новите генерации. Малку се ѕвездите кои оставиле толку силен белег во популарната култура, а уште помалку се оние за кои се зборува со ист интерес децении по нивната смрт.