Американците го ракетираа Иран, сирени се огласија во Кувајт

Договор или нова ескалација? Додека Доналд Трамп уверува дека Техеран сака договор со Вашингтон, американската армија потврди нови напади врз цели во Иран. Исто така, во Кувајт се огласија сирени поради воздушна закана.

Иран возврати со напад врз американска база. На социјалните мрежи се појавија снимки.

„Само седнете и опуштете се“

Трамп на својата социјална мрежа Truth Social порача дека Иран навистина сака договор. Истовремено им возврати на критичарите кои сметаат дека неговата администрација треба побрзо или поостро да реагира кон Техеран.

- Advertisement -

„Само седнете и опуштете се, на крајот сè ќе испадне добро – секогаш е така!“, напиша американскиот претседател.

Напади и сирени

Во исто време, Централната команда на американската армија потврди дека извршила нови воздушни напади врз цели во Иран. Соопштението, пак, беше објавено само неколку минути откако Кувајт соопшти дека бил нападнат.

„Сите експлозии што се слушаат се резултат на дејствувањето на системите за противвоздушна одбрана при пресретнување на непријателските цели“, соопшти Генералштабот на кувајтските вооружени сили во објава на платформата „Икс“.

По нападот во Кувајт се огласиле сирени за предупредување од ракетна и беспилотна закана. Засега нема дополнителни информации за размерите на нападот и евентуалните последици.

Трето прекршување на примирјето

Последните напади претставуваат трето посериозно нарушување на примирјето меѓу САД и Иран договорено на почетокот на април.

Во претходните два случаи и Техеран и Вашингтон настојуваа да го минимизираат значењето на меѓусебните воени дејствија, што овозможи формално да остане во сила договорениот прекин на огнот.

Се крчка договор за Либан?

Во меѓуврее, трае конфликтот во Либан.

Американскиот државен секретар, Марко Рубио, разговарал со либанскиот претседател, Жозеф Аун, и израелскиот премиер, Бенјамин Нетанјаху, за дипломатските преговори меѓу Израел и Либан при што предложил план за „постепена деескалација“ на конфликтот.

Неименуван американски претставник соопштил дека предлогот на САД како прв чекор предвидува прекин на сите напади на проиранското движење Хезболах врз Израел, а за возврат израелските сили да се воздржат од натамошна ескалација на воените дејствија во Бејрут.