Шефот на СЗО повикува на прекин на огнот во Конго за да се спречи епидемијата на ебола

Источен Конго сега се соочува со катастрофална комбинација од болести и конфликти, при што епидемијата на ебола во покраината Итури ги надминува мерките за контрола, изјави шефот на Светската здравствена организација (СЗО), Тедрос Аданом Гебрејесус.

Тој во објава на Xu рече дека „нема вакцина ниту третман“ за сојот на ебола Бундибугио кој моментално се шири во Конго и дека третманот и ограничувањето зависат „исклучиво од хуманитарен пристап“, но дека ова е отежнато или невозможно од растечките конфликти во погодените области.

„Тековните конфликти водат до масовно раселување, туркајќи ги изложените (на вирусот) во преполни кампови и прекинувајќи ги критичните коридори за ограничување. Работниците на првата линија ризикуваат сè, додека нападите врз здравствените установи го прават следењето на случаите и нивните контакти речиси невозможно“, рече Гебрејесус.

- Advertisement -

Во неговиот пост се додава дека СЗО не може да изгради доверба во заедниците или да ги изолира заразените додека „паѓаат бомби“.

„Ги повикуваме сите завојувани страни да се согласат за итен прекин на огнот за да се спречи оваа епидемија. Бараме човечкиот опстанок да биде приоритет пред сè“, се заклучува во постот.

Повеќе од 100 луѓе починаа од новата епидемија на ебола во Конго, а инфекцијата се прошири и во соседна Уганда