ЧЕТВОРИЦА МРТВИ ПО СУДИР НА ВОЗ И УЧИЛИШЕН АВТОБУС ВО БЕЛГИЈА

Четворица загинаа откако во вторник наутро патнички воз удрил во училишен автобус во белгиската покраина Источна Фландрија, во градот Бугенхаут, објавија белгиските медиуми.

Според првичните информации, во автобусот имало 7 деца и двајца возрасни, вклучувајќи го и возачот.

Меѓу загинатите се двајца тинејџери, возачот на автобусот и возрасен човек што ги придружувал учениците. Уште две лица се сериозно повредени, соопшти министерот за транспорт Жан-Лук Кроа.

- Advertisement -

На местото на несреќата се испратени голем број служби за итни случаи, додека властите сè уште го утврдуваат точниот број на жртвите и околностите на судирот.

Белгискиот железнички оператор Инфрабел објави дека во моментот на судирот била активирана сигнализацијата на преминот, односно, светлата биле црвени, а рампите биле спуштени.

Во возот имало околу 100 патници и, според досегашните информации, ниту еден од нив не е повреден.

Возот сообраќал на релација Бриж – Бугенхаут.

– Преминот беше еден километар пред станицата, па возот веќе забавуваше, но ударот, сепак,  беше огромен. Машиновозачот се обиде да ја активира сопирачката за итни случаи, но беше предоцна – изјави портпаролот на инфраструктурата на Инфрабел.

Белгија, каде што густа железничка мрежа минува низ градови и села, има историја на несреќи на премини на ниво.

Пет лица загинаа во вакви несреќи во текот на 2025 година, објави операторот на железничката инфраструктура Инфрабел на својата веб-страница, што е најмал број загинати од 2020 година.