Моџтаба Хамнеи порача дека нема веќе враќање на старото

За Америка нема место во регионот, а крајот на ционистичкиот режим е близу, порача денеска врховниот водач на Иран, ајатолахот Сејед Моџтаба Хосеини Хамнеи, во пораката по повод почетокот на сезоната на аврамскиот хаџ.

– Нема веќе враќање на старото. Народите и земјите во регионот повеќе нема да бидат штит за американските воени бази. Америка во регионот повеќе нема да има безбедно засолниште за интригите и за воспоставување воени бази. Америка од ден на ден се оддалечува од својот претходен статус – изјави Моџтаба Хамнеи, пренесува Тасним.

Тој истакна дека „нестабилниот и канцероген ционистички режим, исто така, се приближува кон завршните фази од својот злокобен живот и дека нема да постои 25 години подоцна“.

- Advertisement -

– Во различни делови на Иран и светот, по овие благословени денови, „смрт за Америка“ и „смрт за Израел“ ќе бидат заеднички слогани на исламската нација и на угнетените во светот, особено на младите – вели Хамнеи.

Тој рече дека „иранските аџии во овогодишниот хаџ играат ефикасна и истакната улога во пренесувањето на приказната на своите други муслимански браќа и сестри за победата во третата наметната војна, давајќи им надеж за светла иднина“.

– Иднината ѝ припаѓа на исламската нација и на новата исламска цивилизација и секој од нас може да игра улога во остварувањето на оваа иднина и во приближувањето кон неа, во согласност со иранските напори, капацитети и одговорност – истакна Моџтаба Хамнеи.

Текстот на пораката на водачот на Исламската револуција до исламската нација утрово го прочита Хоџатолеслам Вал-Муслимин, заменик-претставник на врховниот водач и водач на иранските аџии во пустината Арафат.

Ова е една од ретките изјави што ги даде Хамнеи откако почна американко-израелската војна протв Иран на 28 февруари, кога загина неговиот татко, поранешниот врховен водач. Според достапните извештаи и Моџтаба Хамнеи бил повреден во тој напад и оттогаш не се појавил во јавноста, туку се обраќа само преку писмени изјави.