Пакистан доставил нов „испеглан“ предлог до САД

Американскиот претседател Доналд Трамп повторно испрати драматична порака до Иран и предупреди дека времето за постигнување мировен договор со САД брзо истекува.

На својата платформа Truth Social, Трамп напиша дека Техеран мора „брзо да се движи“ или ќе се соочи со катастрофални последици.

„За Иран, часовникот отчукува и подобро да се движат, БРЗО, или нема да остане ништо од нив. ВРЕМЕТО Е ОД СУШТИНА!“, напиша Трамп.

- Advertisement -

Според американскиот портал „Аксиос“, Трамп во вторник ќе одржи состанок со врвните советници за национална безбедност, на кој ќе се разговара и за можни воени опции против Иран.

„Немаме многу време“

Во меѓувреме, Пакистан доставил ревидиран предлог од Иран до САД, со цел да се најде излез од дипломатскиот ќорсокак.

Неименуван пакистански функционер потврдил дека предлогот бил „испеглан“ и повторно испратен до Вашингтон.

– Немаме многу време – рекол изворот, додавајќи дека двете страни постојано ги менуваат своите цели и услови.

Дронови, пожари и нова ескалација

Новите дипломатски тензии доаѓаат откако напад со беспилотно летало предизвикал пожар во нуклеарна централа во Обединетите Арапски Емирати.

Властите во Емиратите ја нарекоа ситуацијата „опасна ескалација“ и го обвинија Иран или негови посредници за нападот.

Во исто време, Саудиска Арабија соопшти дека пресретнала 3 беспилотни летала.

Техеран, пак, бара траен прекин на огнот во Либан пред да се разговара за поширок мировен договор со Вашингтон.

„Сериозни во преговорите, уште посериозни во војната“

Командантот на Револуционерната гарда на Иран, генерал-мајор Мохсен Резаеи, порача дека Техеран нема да попушти без конкретни чекори од американска страна.

– Американците мора да преземат конкретни акции во преговорите – изјави Резаеи за иранската агенција Тасним.

Тој додаде дека Иран е „сериозен во преговорите, а уште посериозен во војната и одбраната на земјата“.

Либан повторно под оган

Во воздушни напади на Израел врз Либан во неделата загинале седум лица, меѓу кои и командант на Исламски џихад, соопштија либанските власти и државните медиуми.

И покрај кревкото примирје, Хезболах ги оцени разговорите меѓу двете страни, посредувани од САД, како „ќорсокак“.