Протечени извештаи: Пентагон го запира испраќањето на 4.000 војници во Европа

Министерството за одбрана на САД го запре распоредувањето на повеќе од 4.000 војници во Европа, според медиумските извештаи во среда, потег што ги изненади некои воени претставници, објави германската новинска агенција ДПА.

Одлуката е донесена на состанок на Европската команда на САД (EUCOM) и делови од американската војска, објави „Волстрит џурнал“, повикувајќи се на официјален претставник на Пентагон.

Се очекуваше војниците да бидат распоредени во Полска за планирана деветмесечна ротација.

- Advertisement -

Американската војска во март соопшти дека бригадата ќе ги замени другите сили како дел од рутинска ротација.

Според „Волстрит џурнал“, дел од опремата и персоналот веќе биле на пат, што ги изненади некои воени претставници.

Повикувајќи се на неколку претставници на Пентагон, WSJ објави дека EUCOM препорачал повеќе од 4.000 војници да не бидат заменети, но не побарал итно прекинување на мисијата.

Одбранбениот портал Task and Purpose објави дека се очекувало војниците да работат со партнерските сили во Полска како дел од операцијата „Атлантска решителност“, која ја започнаа САД во 2014 година за поддршка на сојузниците на НАТО во Европа по руската анексија на Крим.

Извештајот доаѓа околу две недели откако американскиот министер за одбрана Пит Хегсет нареди повлекување на околу 5.000 американски војници од Германија. Потоа Полска ја повтори својата подготвеност да прими уште повеќе американски сили.

Полскиот претседател Карол Навроцки изјави дека речиси 10.000 американски војници се распоредени во Полска, а повеќето од нив се ротирани во други американски бази низ Европа.