Пеп Гвардиола ги напаѓа судиите и VAR: „Како фрлање паричка е“

Битката за титулата во англиското првенство влегува во драматично финале, а Пеп Гвардиола не зборуваше само за фудбал пред клучниот натпревар на Манчестер Сити против Кристал Палас.

Тренерот на актуелниот англиски шампион отворено ги критикуваше судиите и VAR технологијата, велејќи дека никогаш немал целосна доверба во нивната работа откако пристигна во Премиер лигата.

Сити сè уште верува во пресврт
Две кола пред крајот на сезоната, Манчестер Сити е пет бода зад Арсенал, но имаат и натпревар помалку.

- Advertisement -

Во среда во 21 часот против Кристал Палас, граѓаните ќе имаат можност да ја намалат разликата на само два бода и дополнително да ја комплицираат трката за титулата.

Сепак, Гвардиола смета дека неговиот тим не треба да очекува никаква помош однадвор.

Гвардиола: „VAR е како фрлање паричка“
Тој беше особено погоден од неодамнешната ситуација со поништениот гол на Вест Хем против Арсенал во натпревар што Топџиите го добија со 1-0.

Во таа прилика, Пеп се потсети и на претходните одлуки кои, според него, го чинеа Сити трофејот.

„Изгубивме две финалиња на ФА Купот затоа што судиите, па дури и ВАР, не си ја завршија работата како што треба. Кога тоа ќе се случи, тоа значи дека мора да се справиме подобро, а не да ги обвинуваме судиите или ВАР. Откако сум тука, не верувам во ништо.“

Шпанскиот експерт потоа дополнително го разјасни својот став.

„Секогаш ме водеше фактот дека мора да бидеме подобри, уште подобри. Мора да се ставиме во позиција да бидеме супериорни затоа што ВАР е како фрлање паричка. ВАР не беше воведен минатиот викенд, постои со години и сите моравме да се адаптираме.“