ПОЛИЦАЕЦОТ ВО КРАПИНА БИЛ УБИЕН ДОДЕКА НАРАЧУВАЛ КАФЕ

Крапинскиот крај е завиткан во црно откако во рано утрово на терасата на кафулето „InCaffe“ во склоп на трговскиот центар НТЛ, а потоа и на паркингот, одекнаа истрели од огнено оружје.

Од сè уште неутврдени причини, во 8:10 часот, мештанинот Марин Г. (52) влегол во локалот и, без ниту еден изговорен збор, со три куршуми од пиштол што го поседувал илегално, ладнокрвно го убил шефот на криминалистичката полиција Роберт Грилц (52), кој во тој момент бил надвор од служба и седел на маса, а на осомничениот му бил и сосед од улицата.

Фактот дека ова се одвивало пред најмалку петнаесетина сведоци воопшто не го загрижило убиецот, инаку стар познаник на полицијата. Потоа излегол на паркингот на локалот, каде што, на само неколку метри од своето БМВ со кое дошол, одлучил да се убие и себеси пукајќи си во главата.

- Advertisement -

Паниката што настанала тогаш била неопислива и сите го дочекале пристигнувањето на итните служби видно потресени. И додека за тешко ранетиот Грилц, за жал, веќе немало спас бидејќи им подлегнал на повредите во кафулето, па работниците од Итната помош можеле само да констатираат смрт, убиецот давал знаци на живот. Тој со хеликоптер на медицинската служба итно бил пренесен во Клиничката болница Дубрава. Иако криминалистите се надевале дека од сторителот, кој им го убил колегата и пријателот, што побрзо ќе можат да ги дознаат мотивите за овој луд чин, од болницата по неколку часа пристигнала вест: „Пациентот Марин Г. е подложен на оперативен зафат. Животно е загрозен, се наоѓа во Единицата за интензивна нега и е на респиратор“.

Паралелно со тоа, форензичарите на местото на ужасот вршеле увид, прибирале докази и се обидувале да го реконструираат целиот тек на настаните што му претходеле на злосторството.

Локва крв на паркингот

На паркингот останала голема локва крв откако убиецот бил однесен во болница, но и неговата јакна, пиштолот и шаржерот со преостанатите куршуми. Дали во самото кафуле постоел видео надзор и дали ги забележал критичните моменти не е познато, но важни информации на истражителите им дале и сведоците, почнувајќи од вработените во кафулето до гостите, кои, како и покојниот полицаец, тоа утро дошле во кафулето да испијат кафе.

– Никому не му падна на памет дека тоа ќе се случи. Го видовме Марин како пред 8 часот поминува со автомобилот покрај кафулето и гледа кон локалот. Не можам да кажам дека изгледаше растроено, туку само љубопитно, како да бара некого. А потоа, кога влезе внатре, нè остави сите без зборови. Келнерката примаше нарачка од Роби и стоеше во негова непосредна близина, а Марин по влегувањето им се приближи со пиштол во раката и го насочи кон Роби. Два куршума отидоа кон градите, а еден, мислам, заврши во раката. Престрашно. Не ни сфативме на што сме сведоци, а тој веќе излезе од кафулето и сврте лево. Веднаш слушнавме уште еден истрел – изјавил за „Јутарњи“ еден од сведоците кои се затекнале во локалот.

Келнерката В. Ж. за порталот „Zagorje International“ изјавила дека во моментот на пукањето примала нарачка од убиениот.
– Го уби пред мои очи. Трипати пукаше во него без ниту еден збор. Само го насочи пиштолот и пукаше. Потоа погледна кон мене, а јас побегнав во складиштето – ги опишала В. Ж. страшните моменти.

Останатите сведоци рекле дека полицаецот бил добредојден гостин каде и да се појавел, а за Марин зборувале со задршка поради неговата болест.

Што е мотивот за злосторството?

– Каде и да беше Роби, чувствувавме сигурност бидејќи беше примерен и чесен полицаец. А Марин беше повеќе за улични разговори. Беше чуден. Позадината на убиството треба да се бара во улицата каде што живеат. Ние сме во тотален шок. Соседите се упатени во сечии препирки, како и во тоа кому што му пречи. Марин се лекуваше, беше болен и беше во пензија веќе извесно време. Со него како мештанин немавме проблеми, освен што беше подобро да се избегнува кога за нешто тврдеше дека е во право, а беше во криво. Многу нешта го нервираа. На пример, штом ќе паднеше првиот снег, а патот ќе се заледеше, очекуваше веднаш сè да се исчисти, да исчезне. Едноставно имаше потреба да приговара. А животот со болната, дементна мајка, на која оваа вест само дополнително ќе ѝ ја наруши и онака лошата здравствена состојба, сигурно не му бил лесен бидејќи за тоа треба многу трпение – смета еден жител на Крапина.

Градоначалникот Зоран Грегуровиќ е затекнат од убиството. И убиениот и убиецот ги познавал од видување бидејќи Крапина е мал град. Изразил длабоко сочувство до семејството на убиениот полицаец, како и до неговите колеги и пријатели, не криејќи го шокот и неверицата што завладеала во мирното место.

– Можам да кажам дека сите нè затече оваа вест. Телефонот само почна да ѕвони, а тогаш ни јас сè уште ја немав таа информација. И мене лично сè тоа страшно ме шокираше бидејќи кога вакво нешто ќе се случи во еден мал, мирен град, тоа е голем шок за сите нас кои живееме овде. За жал, никој не можеше да предвиди дека тоа ќе се случи – изјавил градоначалникот на Крапина, укажувајќи на важноста на брзата полициска истрага за да се разјаснат сите околности и да се смири немирот што завладеал во градот.

Ако Марин Г. закрепне и биде отпуштен од лекување, ќе го преземе полицијата и ќе се соочи со сериозни обвиненија поради кои му се заканува повеќегодишен затвор.