Мерц не спомена кој ги ослободил од нацизмот

Германија оди по многу опасен пат одбивајќи да ја признае одлучувачката улога на Советскиот Сојуз во победата над нацизмот, а ова не е прв пат, изјави денеска Дмитриј Песков, портпарол на рускиот претседател Владимир Путин.

– Не е прв пат. Сегашната генерација германски политичари, кои практично молчат за улогата на СССР во победата над нацизмот, воопшто не ја претставуваат Германија во добро светло – додаде Песков.

Тој изрази надеж дека во Германија сè уште има луѓе кои „го зачуваче здравиот разум и се сеќаваат на подвигот на хероите кои го ослободија светот од фашизмот“.

- Advertisement -

Портпаролката на руското Министерство за надворешни работи, Марија Захарова, претходно изјави дека германскиот канцелар Фридрих Мерц очигледно „заборавил кој кого нападнал и кој кого ослободил“ пред 80 години.

Според неа, со потценување на одлучувачката улога на СССР во победата над нацизмот, Берлин се обидува да ги „заведе помладите генерации“ кои растат без ветерани во своите семејства и кои црпат информации од интернет.

Ферманскиот канцелар Фридрих Мерц вчера им ја честиташе на граѓаните за годишнината од ослободувањето од нацистичкиот режим, но не ја спомена одлучувачката улога на Црвената армија, што предизвика критики на социјалните мрежи.

Мерц порача дека 8 мај 1945 година донесе ослободување на милиони луѓе, на Германија и на Европа.

„Овој ден нè повикува никогаш да не заборавиме до што може да доведе омразата. Нè обврзува да се залагаме за слободна, демократска и обединета Германија во силна Европа“ напиша германскиот канцелар на социјалната мрежа Икс.

Кога еден новинар на владиниот брифинг во петокот го праша заменик-портпаролот на германската влада, Штефен Мајер, дали канцеларот Мерц намерно изоставил да ги спомене имињата на ослободителите, за да избегне споменување на Русија или на Советскиот Сојуз, владиниот портпарол одговори дека „тоа може да се должи и на ограничувањето на бројот на карактери на социјалната мрежа Икс.

Кога еден новинар директно го праша кои се ослободителите, Мајер одговори дека „тоа е јасно историски документирано“, избегнувајќи да одговори на прашањето.