Прекршен прекин на огнот во Либан: Израелските напади убија најмалку шест лица

Најмалку шест лица се убиени, а тројца се ранети во нови израелски напади врз јужен и источен Либан, објави либанската државна новинска агенција ННА, додека прекинот на огнот постигнат со посредство на САД е под зголемен притисок.

Според ННА, најмалку четири лица се убиени, а тројца се ранети во израелски воздушен напад врз градот Зелаја во западниот регион Бека во источен Либан. Меѓу убиените се Али Касем Ахмад, шефот на општинскиот совет на Зелаја, и тројца членови на неговото семејство, откако нивната куќа беше погодена.

Израел, исто така, изврши нови воздушни напади врз јужен Либан со воени авиони и беспилотни летала, додека селото Мајфадун беше гранатирано со артилерија. Според либански извори објавени од Ал Џезира, уште две лица се убиени во нападите.

- Advertisement -

Хезболах соопшти дека целта на нападот бил собир на израелски војници, велејќи дека тоа е одговор на израелските напади во неколку области на јужен Либан. Потоа Израел издаде нови наредби за евакуација за жителите на 12 села на југот на земјата, предупредувајќи ги да се оддалечат најмалку еден километар од своите домови.

Повеќето од селата погодени од наредбата се наоѓаат северно од реката Литани, во област која моментално не е под израелска воена окупација. Израелската војска вели дека реагира на кршењата на примирјето од страна на Хезболах, но Ал Џезира известува дека не понудила никакви убедливи докази за ова тврдење.

Според извештајот на Волстрит џурнал, од неделата, во интензивните борби меѓу израелските сили и Хезболах во јужен Либан загинаа 17 лица, што е еден од најсмртоносните бранови на насилство откако започна примирјето во средината на април. Истиот извор вели дека од почетокот на израелските операции во Либан на 2 март, 2.702 лица се убиени, а 8.311 се ранети.

Борбите меѓу Израел и Хезболах продолжија на 2 март, откако Хезболах испука ракети врз Израел по започнувањето на војната меѓу САД и Израел против Иран. И покрај примирјето што стапи на сила во април, нападите и одмаздата продолжија по границата и длабоко во либанската територија.

АП претходно објави дека израелските напади на почетокот на мај убиле најмалку десет лица во јужен Либан, додека нападите на Хезболах повредиле двајца израелски војници.